Հարավային Կորեան պետք է միջուկային զենք ունենա ԿԺԴՀ-ից պաշտպանվելու համար. Սեուլի քաղաքապետ

Հարավային Կորեան պետք է միջուկային զենք ստեղծի Հյուսիսային Կորեայի դեմ պաշտպանությունն ուժեղացնելու համար՝ չնայած միջազգային հետևանքների ռիսկին։  Այս մասին Reuters-ին տված հարցազրույցում հայտարարել է Սեուլի քաղաքապետ Օ Սե Հունը։

Նա նշել է, որ ԿԺԴՀ-ին հաջողվել է թեթևացնել մարտավարական միջուկային զենքը և «ինքն իրեն տրամադրել առնվազն տասնյակ մարտագլխիկներ»։

«Մենք հասել ենք մի կետի, երբ դժվար է տրամաբանությամբ մարդկանց համոզել, որ մենք պետք է զերծ մնանք միջուկային զենք ստեղծելուց և հավատարիմ մնանք ապամիջուկայնացման գաղափարին», - ասել է Օ Սե Հունը:

Սեուլի քաղաքապետը նշել է, որ ուկրաինական ճգնաժամն ամրապնդել է իր համոզմունքը, որ միջուկային զինաթափումը կորցրել է իր գրավչությունը։  Նրա կարծիքով՝ միջուկային զենքը կլինի Հյուսիսային Կորեային զսպելու ամենաարդյունավետ միջոցը։

Օ Սե Հունը խոստովանել է, որ միջազգային հանրությունը ի սկզբանե դեմ է լինելու Հարավային Կորեայի միջուկային ծրագրին, սակայն ժամանակի ընթացքում այն ​​«ավելի մեծ աջակցություն կստանա»։

Հունվարին Հարավային Կորեայի նախագահ Յուն Սեոկ Յոլը հայտարարել էր, որ երկիրը կարող է ստեղծել սեփական միջուկային զենք կամ տեղակայել այն իր տարածքում, եթե ԿԺԴՀ-ի հետ հարաբերությունները վատանան:  Նա հանձնարարել է ապահովել այնպիսի ռազմական հզորություն, որը Հարավային Կորեային թույլ կտա պատասխանել «հարյուր կամ նույնիսկ հազար անգամ» Սեուլի վրա հարձակման դեպքում։