ՏԵՍԱՆՅՈՒԹ. Պետրոսյանը սպառնացել է պարեկներին ու դիմել փախուստի. Ոստիկանություն

Ավելի վաղ հայտնել էինք, որ նախօրեին ձերբակալվել է նախկին պատգամավոր Գեւորգ Պետրոսյանը: Պետրոսյանի փաստաբան Րաֆֆի Ասլանյանը մանրամասներ էր հայտնել Գ.Պետրոսյանի ձերբակալությունից և տեսանյութ հրապարակել: ՀՀ ՆԳՆ ոստիկանությունը հաղորդագրություն է տարածել նախկին պատգամավոր Գեւորգ Պետրոսյանին ձերբակալելու հետ կապված: Հաղորդագրությունում չի նշվում, թե ով է եղել մեքենայի վարորդը, սակայն թե դեպքի ժամը, թե մեքենայի մոդելը և թե Պետրոսյանի փաստաբանի հայտարարությունն ու տարածած տեսանյութը կասկած չեն թողնում, որ ՆԳՆ հայտարարությունը հենց Գևորգ Պետրոսյանի մասին է:

«Մարտի 11-ին՝ ժամը 21:00-ի սահմաններում, ՆԳՆ ոստիկանության պարեկային ծառայության Կոտայքի գումարտակի ծառայողները Աբովյան-Երևան ավտոճանապարհին նկատել են «Մերսեդես» մեքենա, որի վարորդը մեքենան վարել է անկանոն:

Երևանի Հյուսիսային ավտոկայանի մոտակայքում «Մերսեդեսի» վարորդը չի ենթարկվել պարեկների բարձրախոսով հնչեցրած «կանգ առ» օրինական պահանջին և շարունակել է մեքենան անկանոն վարել:

Պարեկները հետապնդել են նրան, ինչի ընթացքում ևս մի քանի անգամ հնչեցրել են «կանգ առ» օրինական պահանջ: Երևանի Ծարավ Աղբյուրի փողոցում մեքենան հարկադրաբար կանգնեցվել է: Վարորդը հնչեցրել է սպառնալիքներ և դիմել փախուստի: Շարունակելով հետապնդումը՝ պարեկները նույն փողոցում կրկին հարկադրաբար կանգնեցրել են մեքենան:

Վարորդը հրաժարվել է ենթարկվել սթափության աստիճանի ստուգումից և սպառնացել է պարեկներին:

Վարորդը ձերբակալվել և տեղափոխվել է ՆԳՆ ոստիկանության Նոր Նորքի բաժին:

Նախաձեռնվել է քրեական վարույթ:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով»: