ՆԱՏՕ-ն անհանգստացած է օտարերկրյա գործակալների մասին Վրաստանի օրենքի նախագծի առնչությամբ․ Կոլոմինա
Հարավային Կովկասում և Կենտրոնական Ասիայում ՆԱՏՕ-ի գլխավոր քարտուղարի հատուկ ներկայացուցիչ Խավիեր Կոլոմինան հայտարարել է, որ ՆԱՏՕ-ն անհանգստացած է Վրաստանի խորհրդարանի կողմից առաջին ընթերցմամբ ընդունված օտարերկրյա գործակալների մասին օրինագծի առնչոթյամբ։
«ՆԱՏՕ-ն անհանգստացած է Թբիլիսիում առաջին ընթերցմամբ ընդունված օրինագծի առնչությամբ: Վրաստանի համար՝ որպես ՆԱՏՕ-ի թեկնածու, բանալի է ունենալ ճիշտ հիմք լրատվամիջոցների ազատության և քաղաքացիական հասարակության մասնակցության ապահովման համար»,- սոցցանցում գրել է Կոլոմինան։
«Այս նախագիծը նահանջ է և առաջ չի տանում Վրաստանի եվրատլանտյան ինտեգրման նպատակը»,- ասել է Հյուսիսատլանտյան դաշինքի գլխավոր քարտուղարի հատուկ ներկայացուցիչը։
Չորեքշաբթի Վրաստանի խորհրդարանի շենքի մոտ սկսվել է օտարերկրյա գործակալների մասին օրենքի ընդունման դեմ ցույցը։ Հանրահավաքը խաղաղ է անցել, սակայն իրավիճակը սրվել է այն բանից հետո, երբ ընդդիմադիր «Ռազմավարություն Աղմաշենեբելի» կուսակցության առաջնորդ Գիորգի Վաշաձեն հանրահավաքի մասնակիցներին կոչ է արել շրջափակել խորհրդարանի շենքը։ Որոշ ցուցարարներ այս ընթացքում սկսել են կոտրել խորհրդարանի շենքի ապակիները, կոտրել պատնեշները և փորձել ներխուժել ներս։ Ի պատասխան այս գործողությունների՝ ոստիկանությունը սկսել է կիրառել արցունքաբեր գազ և ջրցան մեքենաներ։
