ՏԵՍԱՆՅՈՒԹ․ Հարավային Կորեայում բեռնատարը մխրճվել է մարդկանց բազմության մեջ. կան զոհեր և վիրավորներ
Չորեքշաբթի Սունչան գավառի հարավ-արեւմուտքում փոքր բեռնատարը մխրճվել է մարդկանց բազմության մեջ, կան զոհեր եւ վիրավորներ, հաղորդում է Yonhap-ը:
Պարարտանյութ տեղափոխող բեռնատարը մարդկանց է բախվել գյուղատնտեսական կոոպերատիվի շենքի մոտ գտնվող կայանատեղիում՝ Սեուլից 244 կմ հեռավորության վրա, տեղական ժամանակով 10։30-ին։
Վթարի հետեւանքով երեք մարդ մահացել է։ Եվս հինգ մարդ լուրջ վնասվածքներ է ստացել, 12-ը՝ վիրավորվել։ Նրանք բոլորը հոսպիտալացվել են։
Փրկարարների խոսքով՝ զոհերի թիվը կարող է ավելանալ, քանի որ տուժածների թվում հիմնականում տարեցներ են։
Ոստիկանությունը պարզում է վթարի պատճառը։ Նախնական վարկածով՝ պատահարը տեղի է ունեցել վարորդի սխալի պատճառով։
