Բախմուտկա գետից արևելք ամեն ինչ ամբողջությամբ գտնվում է «Վագներ»-ի վերահսկողության տակ. Պրիգոժին

Ռուսական ուժերն ամբողջությամբ վերահսկողության տակ են վերցրել Բախմուտի (ռուսական անվանումը՝ Արտյոմովսկ) արևելյան հատվածը։ Այս մասին այսօր հայտնել է «Վագներ» մասնավոր ռազմական կազմակերպության հիմնադիր Եվգենի Պրիգոժինը, գրում է ՏԱՍՍ-ը։

««Վագներ»-ի ստորաբաժանումները գրավել են Բախմուտի ամբողջ արևելյան հատվածը: Բախմուտկա գետից արևելք ամեն ինչ ամբողջությամբ գտնվում է «Վագներ»-ի վերահսկողության տակ»,- ասել է Պրիգոժինը, որի խոսքերը թելեգրամյան ալիքում հրապարակել է նրա մամուլի ծառայությունը։

Հավելենք, որ Բախմուտը գտնվում է ինքնահռչակ Դոնեցկի Ժողովրդական Հանրապետության այն մասում, որը վերահսկվում է Կիևի կողմից և կարևոր տրանսպորտային հանգույց է Դոնբասում ուկրաինական զորքերի խմբավորման մատակարարման համար։ 

ՌԴ ՊՆ ղեկավար Սերգեյ Շոյգուն ավելի վաղ ասել էր, որ Բախմուտի համար մարտերը շարունակվում են։ Նա նշել է, որ քաղաքի գրավումը թույլ կտա հարձակում իրականացնել ուկրաինական զորքերի պաշտպանության խորքում։