«Ըստ իրենց պատկերացումների` վաղուց պետք է նվաճած լինեին Բախմուտը». Կուլեբա

Ուկրաինայի արտաքին գործերի նախարար Դմիտրի Կուլեբան հայտարարել է, որ եթե ուկրաինական զորքերը նահանջեն Բախմուտից (Դոնեցկի մարզ), ապա նոր Բախմուտը կդառնա մեկ այլ քաղաք։ Այս մասին հայտնում է РБК-Украина-ն՝ հղում անելով WAZ-ին տված հարցազրույցում Ուկրաինայի ԱԳՆ ղեկավարի խոսքերին։

«Նրանք, ովքեր բողոքում են, որ պաշտպանությունը շատ զոհեր է տալիս, չպետք է մոռանան. եթե մենք նահանջենք, նոր Բախմուտը կդառնա մեկ այլ քաղաք: Այդ իսկ պատճառով մեր զինվորները կռվում են յուրաքանչյուր քառակուսի սանտիմետր հողի համար», - ասել է Կուլեբան: Նա վստահություն է հայտնել, որ ուկրաինական ուժերը կպահեն Բախմուտը:

Նաև, ըստ նախարարի, Ռուսաստանի Դաշնության նոր հարձակումն արդեն սկսվել է, և ռուսները նախատեսում են մինչև գարուն ուժեղացնել մարտերի ինտենսիվությունը։

«Բայց նրանց ծրագիրը չի աշխատի, նրանք, ըստ իրենց պատկերացումների, վաղուց պետք է նվաճած լինեին Բախմուտը»,- ասել է Կուլեբան։