Հունգարիան և Ադրբեջանը համատեղ ռազմավարական հռչակագիր են ստորագրել

Հունգարիայի վարչապետ Վիկտոր Օրբանը և Ադրբեջանի նախագահ Իլհամ Ալիևը համատեղ հռչակագիր են ստորագրել երկու երկրների միջև ընդլայնված ռազմավարական գործընկերության մասին: Այս մասին հայտնել են ադրբեջանական ԶԼՄ-ները: Նշվում է, որ հռչակագիրը ստորագրվել է Բուդապեշտում երկու երկրների միջև կայացած բանակցությունների արդյունքում:

Բացի դա, կողմերը ստորագրել են ևս 6 փաստաթուղթ, այդ թվում՝ բնական գազի ոլորտում համագործակցության վերաբերյալ փոխըմբռնման հուշագիրը, ինչպես նաև Շուշի և Վեսպրեմ քաղաքների միջև բարեկամական կապերի հաստատման հուշագիրը։ 

Հունգարիայի վարչապետը, մեկնաբանելով բանակցությունները, հայտարարել է, որ Բաքվի և Բուդապեշտի ուշադրության կենտրոնում էներգետիկ հարցերն են: Օրբանի խոսքով՝ Ադրբեջանը կարևոր երկիր է Եվրոպայի էներգամատակարարման համար։ 

Ինչպես գրում է РИА Новости-ն` Ալիևը Օրբանի հետ հանդիպման ժամանակ հայտարարել է, թե Ադրբեջանը կարող է 100 տարի շարունակ էներգիայի հուսալի մատակարար լինել Եվրոպայի համար: 

«Մեր երկիրը բավականաչափ էներգիա ունի, որ հաջորդ հարյուր տարում որպես հուսալի մատակարար բավարարի Եվրոպայի պահանջները»,- ասել է նա: