«Ադրբեջանցիներն անցնում են պլան Բ-ի». Նաիրա Կարապետյան
ԱԺ նախկին պատգամավոր, «Եվրոպական ինտեգրացիա» ՀԿ նախագահ Նաիրա Կարապետյանը ֆեյսբուքյան իր էջում գրել է․ «Եվրոպայի խորհրդում ընդունված է ԵԽԽՎ հիմնական պլենար օրակարգից բացի անցկացնել այլ քննարկումներ՝ side event:
Տեսեք, թե ինչպես են պատրաստվել արդբեջանցիները, մի ամբողջ ողբ են հորինել՝ Բերձորի միջանցքի իրենց փակ պահելու հիմնավորումը եվրոպացիներին հրամցնելու համար:
«Էկո» փուչիկի տակից չեն կարողանում դուրս գալ, քանի որ որևէ միջազգային դիտորդ չի գալիս Կաշեն՝ ուսումնասիրելու, հիմա անցնում են պլան Բ-ի:
Պլան Բ-ն եվրոպացիներին հաճոյացնելու համար խփում է նաև ռուսներին՝ միջանցքով հայերը ականներ են տանում, պիտի անցակետեր դնենք, ռուսները չեն ապահովում իրենց անվտանգությունը:
Ուզում եմ հավատալ, որ մեր պատվիրակությունն ու դիվանագետները կմասնակցեն այն միջոցառմանը և կհնչեցնեն իրականությունը»:
Հիշեցնենք` դեկտեմբերի 12-ի առավոտյան Շուշի-Քարին տակ խաչմերուկի հատվածում քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակել են Արցախը Հայաստանին կապող Ստեփանակերտ-Գորիս մայրուղին։
Դեկտեմբերի 13-ից ադրբեջանական կողմն անջատել էր նաև Արցախի գազամատակարարումը, որը վերականգնվեց դեկտեմբերի 16–ի առավոտյան։
Գազամատակարարումը կրկին ընդհատվեց, ապա ժամեր անց վերականգնվեց նաև հունվարի 17–ին։
Հունվարի 18-ին հայտնի դարձավ, որ Ադրբեջանը կրկին խափանել է Արցախը սնուցող միակ գազատարի աշխատանքը։ Ադրբեջանական կողմն այսօր մասամբ բացել է Հայաստանից Արցախ մտնող միակ գազատար խողովակը, սակայն թույլ ճնշման պատճառով գազամատակարարումը հանրապետությունում կվերականգնվի որոշակի սահմանափակումներով։
Հունվարի 9-ից ադրբեջանական վերահսկողության տակ գտնվող տարածքից անջատվել է նաև Հայաստանից դեպի Արցախ էներգասնուցումը: Ադրբեջանական կողմը հնարավորություն չի տալիս, որ մասնագետները մոտենան և հասկանան պատճառները՝ անհրաժեշտության դեպքում վթարավերականգնողական աշխատանքներ իրականացնելու համար: Արցախում էլենտրաէներգիայի մատակարարումն իրականացվում է հովհարային անջատումներով։
Լաչինի միջանցքը շարունակում է փակ մնալ։
