ԵՄ-ն նախատեսում է Հայաստանի և Ադրբեջանի սահման ուղարկել մինչև 100 դիտորդ` երկամյա ժամկետով

Եվրամիությունը նախատեսում է Հայաստանի և Ադրբեջանի սահման ուղարկել նոր առաքելություն, որը կունենա մինչև 100 դիտորդ և երկամյա մանդատ կստանա: Այս մասին գրում է եվրոպական Politico-ն՝ հղում անելով ԵՄ դիվանագիտական ծառայության աղբյուրներին:

«Երևանի հետ փոխադարձ ընկալում կար, որ ներկայությունը վերականգնելու անհրաժեշտություն կա, բայց նախորդը չափազանց համեստ էր։ Այժմ տարածաշրջան կուղարկվեն մինչև 100 դիտորդ՝ անվտանգության և պաշտպանության ընդհանուր քաղաքականության լիարժեք առաքելության շրջանակում», - հայտնել է աղբյուրը պարբերականին։
 

Աղբյուրի խոսքով՝ երկամյա մանդատով առաքելության նախագիծը հաստատման համար կուղարկվի Բրյուսելի քաղաքականության և անվտանգության կոմիտե:

2022 թվականի հոկտեմբերին ԵՄ արտգործնախարարները Լյուքսեմբուրգում կայացած նիստում պաշտոնապես հաստատել են 40 դիտորդների ուղարկումը Հայաստան՝ Ադրբեջանի հետ սահման։ Այս առաքելությունը երկու ամսով էր, այն ավարտվեց դեկտեմբերի 19-ին։