Գերմանական Adidas կոնցեռնը հետաքննություն կսկսի ամերիկացի ռեփեր Քանյե Ուեսթի ոչ պատշաճ պահվածքի վերաբերյալ անանուն նամակի շուրջ, ում հետ ապրանքանիշը նախկինում թողարկել էր Yeezy հագուստի համատեղ շարքը։  Այս մասին գրում է Financial Times-ը՝ վկայակոչելով ընկերության հայտարարությունը։

«Ներկայումս պարզ չէ, թե արդյոք անանուն նամակում տեղ գտած մեղադրանքները համապատասխանում են իրականությանը։ Այնուամենայնիվ, մենք շատ լուրջ ենք վերաբերվում այդ մեղադրանքներին և որոշել ենք անհապաղ սկսել անկախ հետաքննություն այս հարցով»,- վստահեցրել են ընկերությունից։

Նշվում է, որ ընկերությունը հետաքննություն անցկացնելու որոշում է կայացրել այն բանից հետո, երբ խոշոր բաժնետերերից մեկը պահանջել է պարզաբանել ենթադրյալ միջադեպերը։

Adidas-ը խզեց համագործակցությունը ռեփերի հետ հոկտեմբերի 25-ին: Ավելի ուշ Forbes-ի լրագրողները հաշվարկել են, որ Քանյե Ուեսթը կորցրել է միլիարդատիրոջ կարգավիճակը՝ Adidas-ի հետ համագործակցության դադարեցման պատճառով։  Cowen ներդրումային բանկի տվյալներով՝ գործարարը կորցրել է իր ամենամեծ պայմանագիրը, որը կազմել է 1,5 միլիարդ դոլար (91,9 միլիարդ ռուբլի):