«Զելենսկին կատակերգական արտիստ է, սակայն սա կատակերգություն չէ». Լավրով
Որքան երկար ձգձգի Կիեւը բանակցությունները, այնքան իր համար ավելի դժվար կլինի համաձայնության գալ Մոսկվայի հետ: Այս մասին հայտարարել է ՌԴ ԱԳ նախարար Սերգեյ Լավրովը։
ՌԴ ԱԳ նախարարը նշել է, որ ՌԴ նախագահ Վլադիմիր Պուտինը բազմիցս ասել է, թե Մոսկվան երբեք չի մերժել եւ երբեք չի հրաժարվում բանակցություններից, եւ որ նրանք, ովքեր հրաժարվում են, մասնավորապես Կիեւը՝ «արեւմտյան հովանավորների անմիջական ցուցումով», պետք է տեղյակ լինեն, որ բանակցությունների հարցում հետագա դժվարություններ կունենան։
Լավրովի խոսքով` սեպտեմբերի 30-ին Կրեմլում ունեցած իր ելույթում Պուտինը կրկին կոչ է արել Կիեւի իշխանություններին՝ դադարեցնել ռազմական գործողությունները եւ նստել բանակցությունների սեղանի շուրջ։ Արեւմուտքը հերթական անգամ չի լսել, իսկ Ուկրաինայի նախագահ Վլադիմիր Զելենսկին նույնիսկ հրամանագիր է ստորագրել, որով արգելում էր Ռուսաստանի Դաշնության հետ համաձայնագրերը։
«Նա կատակերգական արտիստ է, սակայն սա կատակերգություն չէ: Ուկրաինայում իրադարձությունները ողբերգական ընթացք են ստանում այն ամենի պատճառով, ինչ կատարվում է այս ռեժիմի որոք, որը վայելում է Արեւմուտքի բացարձակ անպատժելիությունը»,- նշել է Լավրովը։
