Լիզ Թրասի հեռախոսը «կոտրել» են. ի՞նչ են պարզել հաքերները
Մեծ Բրիտանիայի նախկին վաչապետ Լիզ Թրասի հեռախոսը «կոտրել» են: Այս մասին հայտնում է The Daily Mail-ը և նշում, որ դա եղել է այն ժամանակ, երբ Թրասը դեռ արտաքին գործերի նախարար էր: Ըստ պարբերականի` հաքերներն իմացել են այն ժամանակվա վարչապետ Բորիս Ջոնսոնի վերաբերյալ Թրասի քննադատության, ինչպես նաև բրիտանական դաշնակիցների հետ բանակցությունների և Ուկրաինային զենքի մատակարարումների քննարկման մասին:
Դրա մասին հայտնի է դարձել պահպանողականների նախընտրական արշավի ժամանակ, որն անցկացվել է ամռանը։ Միջադեպը, լրագրողների տեղեկություններով, թաքցրել են Բորիս Ջոնսոնը, որն այդ պահին զբաղեցնում էր վարչապետի պաշտոնը, և նախարարների կաբինետի քարտուղար Սայմոն Քեյսը:
Հաքերների ձեռքում են հայտնվել Ջոնսոնի քննադատությամբ Թրասի հաղորդագրությունները, Ուկրաինայի իրադրության վերաբերյալ այլ երկրների ԱԳ նախարարների հետ քննարկումները, ինչպես նաև Կիևին զենքի մատակարարումների քննարկումը։
Ենթադրվում է, որ հեռախոսը կոտրվել է «ռուսական գործակալների» կողմից։ Այս պահի դրությամբ բջջային հեռախոսը գտնվում է պահպանվող պետական հիմնարկի փակ պահարանում, քանի որ գողացված տվյալները, ըստ լրատվականների, խիստ վարկաբեկիչ են եղել։
