Գերմանիան և Իրանը միմյանց դեսպաններին կանչել են ԱԳՆ-ներ

Բեռլինում Իրանի դեսպանը նախօրեին կանչվել է Գերմանիայի ԱԳՆ, նույն օրը Թեհրանում Գերմանիայի դեսպանին կանչել են տեղի ԱԳՆ, լրագրողներին հայտնել է Գերմանիայի արտաքին գործերի նախարարության ներկայացուցիչ Անդրեա Զասսեն: Տեղեկատվությունը փոխանցում է ՌԻԱ Նովոստին:

«Ես կարող եմ հաստատել, որ ինչպես Թեհրանում մեր դեսպանը, այնպես էլ այստեղ՝ Բեռլինում Իրանի դեսպանը երեկ կանչվել են այն երկրների ԱԳՆ, որտեղ նրանք գտնվում են», - ասել է Գերմանիայի ԱԳՆ ներկայացուցիչը ուրբաթ կայացած ճեպազրույցի ժամանակ:

Նա հստակեցրել է, որ թե այս, թե մյուս դեպքում դեսպանները քննարկել են Իրանի դեմ ուղղված միջոցառումների փաթեթը, որը չորեքշաբթի ներկայացրել է Գերմանիայի արտաքին գործերի նախարար Աննալենա Բերբոկը:
 

Ավելի վաղ Գերմանիայի ԱԳ նախարարը նշել էր, որ Իրանի հետ երկկողմ հարաբերությունների վարումն արդեն անթույլատրելի է այդ երկրում մարդու իրավունքների հետ կապված իրավիճակի պատճառով:
Բերբոկն այն ժամանակ հայտարարել էր, որ Գերմանիան մտադիր է վիզային սահմանափակումներ մտցնել Իրանի դեմ։