«Թուրքական բանակը քիմիական զենք է օգտագործել». Թուրքիայի իշխանություններն արձագանքել են բժշկի հայտարարությանը
Թուրք բժիշկների միության նախագահ, պրոֆեսոր Շեբնեմ Քորուր Ֆինջանջըն հայտարարել է, որ թուրքական բանակը «ահաբեկիչների» հետ բախումների ժամանակ քիմիական զենք է օգտագործել, գրում է ermenihaber-ը։
Ֆինջանջըն նշել է, որ ինքն այդ եզրակցությանը եկել է՝ զննելով սպանված «ահաբեկիչների» (քուրդ զինյալների-խմբ.) մարմինները:
«Ավելի վաղ էլ եմ զննել: Նյարդային համակարգն ուղիղ ախտահարող գազերից մեկն է օգտագործվել: Քիմիական զենքի տարբեր տեսակներ կան, և, չնայած դրանց օգտագործումն արգելված է, միևնույն է, տեսնում ենք, որ բախումների ժամանակ օգտագործվում է», - ասել է թուրք պրոֆեսորը՝ ավելացնելով, որ դրա համար Թուրքիայի վերաբերյալ հետաքննություն պետք է իրականացվի:
Այդ հայտարարությանը կոշտ են արձագանքել Թուրքիայի իշխանությունները: Նախագահի գլխավոր խորհրդական ու խոսնակ Իբրահիմ Քալընը այս հայտարարությունը որակել է ահաբեկչական կազմակերպությունների կազմակերպած զրպարտություն:
Իշխող «Արդարություն և զարգացում» կուսակցության (ԱԶԿ-AKP) խոսնակ Օմեր Չելիքն էլ գրել է, որ «թուրքական բանակին «զրպարտողները» նպատակ ունեն արդարացնելու ահաբեկչական կազմակերպության (Քրդստանի բանվորական կուսակցություն-ՔԲԿ/PKK) հանցագործությունները»:
