Ինչպես ազատվել կեղծ ահազանգերից. Մարտիրոսյանը՝ թեմայի մասին

 Տեխնիկայի ժամանակակից զարգացվածության պատճառով հնարավոր չէ պարզել, թե էլեկտրոնային փոստով կեղծ ահազանգ կատարողը ով է, նույնիսկ լավ կրթված դպրոցականը կարող է իր էլեկտրոնային հասցեն այնպես քողարկել, որ ոչ մի երկրի ծառայություն չկարողանա պարզել: Այս մասին 24News-ի հետ զրույցում ասել է Տեղեկատվական անվտանգության փորձագետ Սամվել Մարտիրոսյանը՝ անդրադառնալով վերջին շրջանում պայթուցիկ նյութերի տեղադրման մասին հնչող կեղծ ահազանգերին:
 

Նրա կարծիքով,  խնդիրը պետք է այլ կերպ լուծել, մարդաշատ վայրերում ուժեղացնելով անվտանգության հսկողությունը.

«Հասկանալի է, որ օրենքն է պահանջում, որ ահազանգի հետևից գնալ, բայց այլ մեխանիզմներ պետք է մտածեն, փաստացի՝ ԱԻՆ-ի աշխատակիցների մի մասը աշխատանքից կտրվում է, ամբողջ պետական ռեսուրսը կենտրոնանում է այդ ահազանգի վրա: Կարևորագույն կառույցները դադարում են աշխատել, բացի այդ՝ ստուգումները չեն կարող իրական լինել,  ամբողջ օդանավակայանը ստուգելու համար բավական ժամանակ է պետք: Պետք է անվտանգային համակարգը ուժեղացնել, ոչ թե ահազանգի հետևից գնալ: Հիմնականում նման տեղեկությունները դժվար թե ճիշտ լինեն, ահաբեկիչները նման կերպ չեն գործում»:  

Մարտիրոսյանի կարծիքով,  զանգերի նպատակը երկրում վախի մթնոլորտ ձևավորվելն ու պետական կառուցների նկատմամբ վստահությունը գցելն է:

Հավելենք, որ արդեն տևական ժամանակ է, որ էլեկտրոնային փոստով կեղծ տեղեկատվություն է ուղարկվում Մետրոպոլիտենում պայթուցիկ ռումբի տեղակայման մասին, որի պատճառով մետրոպոլիտենի աշխատանքները դադարեցվում է և քաղաքացիներին տարհանում են: Օգոստոսի 14-ին ևս մետրոպոլիտենում, Գրիգոր Լուսավորիչ եկեղեցում, առևտրի կենտրոններում ռումբի տեղադրման մասնին կեղծ ահազանգ էր հնչել: 

Հիշեցնենք, որ ժամեր առաջ ԱԻՆ քարտուղարությանը էլեկտրոնային նամակով հաղորդագրություն է ուղարկվել, որ Երևանի մետրոլիտենի կայարանում և Զվարթնոց օդանավակայանում պայթուցիկ սարքեր են տեղադրված, որի պատճառով մետրոյի  բոլոր կայարաններում դադարեցվել է գնացքների երթևեկությունը։ Ստուգումների արդյունքում պարզվել է, որ ահազանգը կեղծ է եղել։