ԱԺ արտահերթ նիստն այդպես էլ չկայացավ. ընդդիմության փորձը ձախողվեց

 ԱԺ արտահերթ նիստ հրավիրելու ընդդիմության փորձը վերջնականապես ձախողվեց։ Հատկացված 4 ժամը լրանալուց հետո քվորում չապահովվեց։ Ընդդիմադիր պատգամավորների բավարար թվով ստորագրությունների առկայությամբ հրավիրված արտահերթ նիստին 107 պատգամավորներից միայն 31-ն էին ներկա, որոնցից միայն մեկն էր իշխող մեծամասնության ներկայացուցիչ՝ ԱԺ փոխնախագահ, ԱԺ նախագահի ժամանակավոր պաշտոնակատար Հակոբ Արշակյանը։ Քվորում ապահովելու համար անհրաժեշտ էր 54 պատգամավորի ներկայություն։

Հանդիպման օրակարգում ընդամենը մեկ հարց էր՝ «Հայաստան» խմբակցության ներկայացրած հայտարարության նախագիծը, որով  դատապարտվում է այսպես կոչված ադրբեջանա-թուրքական «Շուշիի հռչակագիրը»։ Ավելի վաղ հայտարարության նախագիծն աջակցություն չէր ստացել ԱԺ հանձնաժողովի կողմից, քանի որ ՔՊ-ական պատգամավորները ձեռնպահ էին մնացել։