Նոր հռչակագրով ՌԴ-ն ու Ադրբեջանը պաշտոնապես ռազմական օգնություն կցուցաբերեն միմյանց

Մոսկվան և Բաքուն «կասեցնելու են անձանց և կազմակերպությունների գործունեությունը, որոնք ուղղված են երկու երկրների պետական ինքնիշխանության և տարածքային ամբողջականության դեմ»: Այս մասին նշվում է ՌԴ-ի և Ադրբեջանի դաշնակցային փոխգործակցության մասին հռչակագրում:

Լեռնային Ղարաբաղի վերաբերյալ պայմանավորվածությունների վերաբերյալ Փաստաթղթում նշվում է, որ Ռուսաստանի Դաշնությունը և Ադրբեջանի Հանրապետությունը այսուհետ ևս աջակցություն կցուցաբերեն Ադրբեջանի Հանրապետության Նախագահի, Հայաստանի Հանրապետության վարչապետի և Ռուսաստանի Դաշնության նախագահի 2020թ. նոյեմբերի 9/10-ի, 2021թ. հունվարի 11-ի և 2021թ. նոյեմբերի 26-ի հայտարարությունների դրույթների իրականացման ջանքերին, որոնք հիմք են ծառայել կայունության և անվտանգության ամրապնդման համար, տարածաշրջանում բոլոր տնտեսական և տրանսպորտային կապերի ապաշրջափակման և Ադրբեջանի Հանրապետության և Հայաստանի Հանրապետության միջև հարաբերությունների կարգավորման համար: 

Հռչակագրի տեքստի համաձայն՝ կողմերը «փոխգործակցում են արտաքին քաղաքական գործունեության ոլորտում՝ Կովկասյան և Կասպիական տարածաշրջաններում կայունության և անվտանգության ապահովման նպատակով»: Հռչակագրում, բացի դա, կան ատոմային էներգետիկայի ոլորտում փոխգործակցությանը, անվտանգության սպառնալիքներին վերաբերող դրույթներ:
 

Նշենք, որ ՌԴ-ի և ԱՀ-ի դաշնակցային փոխգործակցության մասին Հռչակագիրն այսօր ստորագրվել է Մոսկվայում Ադրբեջանի և Ռուսաստանի նախագահների կողմից՝ 4,5 ժամ տևած բանակցությունների արդյունքում: Փաստաթղթի ստորագրումը նվիրված է երկու պետությունների միջև դիվանագիտական հարաբերությունների հաստատման 30-ամյակին։