Կայացել է Շիրակի պետական համալսարանի ռեկտորի ընտրությունը
Փետրվարի 19-ին Շիրակի պետական համալսարանում կայացել է ռեկտորի թափուր պաշտոնի տեղակալման մրցույթը։ Ռեկտորի պաշտոնի միակ թեկնածուն գրեթե 3 տարի համալսարանի ռեկտորի պաշտոնակատար Երվանդ Սերոբյանն էր:
Ռեկտորի ընտրության համար այսօր գումարված նիստին հոգաբարձուների խորհրդի 20 անդամից ներկա էր 19-ը։
Երվանդ Սերոբյանն ընդունված կարգի համաձայն ներկայացրեց ՇՊՀ-ի զարգացման իր հայեցակարգը, պատասխանեց հոգաբարձուների խորհրդի անդամների հարցերին։
Այնուհետ կազմվեց հաշվիչ հանձնաժողով և կայացավ փակ գաղտնի քվեարկություն: Քվերակության արդյունքում Երվանդ Սերոբյանին հոգաբարձուների խորհրդի 19 անդամներից կողմ քվեարկեց 12-ը, դեմ՝ 7-ը:
Հոգաբարձուների խորհուրդը կայացած քվեարկության արդյունքում Երվանդ Սերոբյանին ՇՊՀ-ի ռեկտոր ընտրելու մասին որոշում կայացրեց:
Նշենք, որ մինչ այս մի քանի անգամ ևս անցկացվել էին մրցույթներ, որոնք ավարտվել էին առանց ռեկտորի ընտրության:
