90 միլիոն դրամ. ինչու՞ են որոշել փոխել ԱԺ նախագահի մեքենան

Կառավարության այսօվա նիստում որոշում կայացվեց թույլատրել Հայաստանի Հանրապետության Ազգային ժողովին ձեռք բերել մարդատար ավտոմեքենա BMW 750Li xDrive LCI դասի մեկ անձից գնման ընթացակարգով: Ավտոմեքենան ձեռք կբերվի ԱԺ նախագահ Ալեն Սիմոնյանի համար։ 

ArmDaily.am-ի հետ զրույցում ԱԺ նախագահի մամուլի խոսնակ Ծովինար Խաչատրյանը ասաց, որ մեքենան գնվելու է «Եվրոմոթորս» ՓԲԸ-ից, որը BMW-ի պաշտոնական ներկայացուցիչն է Հայաստանում։

«ԱԺ-ն առաջնորդվել է առավելագուն խնայողություն անելու եղանակով։ Ինչ վերաբերում է ԱԺ նախագահին այս պահին սպասարկող մեքենային, ապա նշեմ, որ այն զրահապատ չէ, շահագործման ժամկետը շուրջ յոթ տարի է՝ սպառվել է, ինչի հետևանքով սպասարկումը բավական մեծ ծախսեր է պահանջում, օրինակի համար անվադողերի փոխումն արժե 17 միլիոն դրամ։ Նոր մեքենայի անհրաժեշտությունը բացատրվում է անվտանգության, ներկայացուցչություն ապահովելու նպատակով, ինչպես նաև խնայողության առումով, քանի որ ներառում է երաշխիքային և պահպանման ծախսերը; Մեքենան ձեռք է բերվում ՀՀ ԱԺ 2021թվականի խնայողությունների հաշվին»,- ասել է Խաչատրյանը։

Նշենք, որ նոր մեքենայի գնման համար տրամադրվելու է 90 միլիոն դրամ: