Ադրբեջանցիները վերջին իրադարձություններից հետո Սև լճից առաջ են եկել.Վահե Հակոբյան
Ադրբեջանցիները Սև լճի հատվածն օգտագործեցին որպես «պլացդարմ», հետո այդտեղից էլ առաջացան, վերջին իրադարձություններից հետո՝ Սև լճից առաջ են եկել: Այս մասին «Փաստինֆո»-ի հետ զրույցում ասել է «Հայաստան» խմբակցության պատգամավոր Վահե Հակոբյանը, որը երեկ մեկնել էր Սյունիք:
Ըստ Հակոբյանի՝ ադրբեջանցիները ցանկանում են իրենց կողմից զավթված Քարվաճառը՝ Սյունիքով կապել Նախիջևանի հետ.
«Եթե քարտեզով նայենք՝ դա մեր երկրի ամենանեղ հատվածն է, որը միացնում է Ադրբեջանի կողմից պատերազմի ժամանակ զավթած Քարվաճառը և Նախիջևանը, այսինքն՝ ուզում են դեպի Նախիջևան ճանապարհ ստանալ»,-ասել է նա:
Պատգամավորի հաղորդմամբ՝ արևելյան հատվածում սահմանային վերջին լարվածությունից հետո՝ հայկական կողմը Սյունիքում դիրքային կորուստներ ունի հենց այն հատվածներում, որտեղից ադրբեջանցիները ներխուժել էին դեռևս մայիսին:
Թեև ՊՆ-ն հաստատել էր Սյունիքում երկու մարտական դիրքի կորստի մասին, սակայն պատգամավորի հաղորդմամբ՝ հենակետային կորուստներն ավելի շատ են:
Վահե Հակոբյանի արձանագրմամբ՝ հակառակորդը դիրքեր գրավելով՝ ստանում է իր համար Սյունիքով միջանցքը, ինչի մասին խոսում է.
«Ընդ որում, այս տեմպով եթե շարունակվի, այդ միջանցքը լինելու է երկու տեղով՝ Սիսիանի հատվածով, Անգեղակոթ, Շաղատ գյուղերով դեպի Իշխանասար, որը հատում է Գորիս- Կապան ճանապարհը, իջնում է Անգեղակոթ, Շաղատ և մտնում Նախիջևան: Երկրորդ հատվածը՝ Զանգելանից դեպի Օրդուբադ՝ էլի Սյունիքով »,-ասել է Վահե Հակոբյանը:
Ինչ վերաբերում է ադրբեջանական ագրեսիայի հետևանքով հայկական կողմի զոհերի և գերիների թվին՝ Վահե Հակոբյանը նշեց, որ հստակ տվյալներն չունի, միևնույն ժամանակ ասաց, որ ո՛չ Գորիսի, ո՛չ Սիսիանի հոսպիտալներում վիրավորներ չկան.
«Սա ի՞նչ է նշանակում՝ կամ գերեվարվել են, կամ զոհվել են»,-ասաց նա:
Երեկ Նիկոլ Փաշինյանը ԱԺ ամբիոնից ըստ էության մեղադրեց գերիներին՝ գերի ընկնելու մեջ և հայտարարեց, որ պետք է գերի ընկնելու բոլոր դեպքերն ուսումնասիրվեն:
Վահե Հակոբյանի դիտարկմամբ՝Նիկոլ Փաշինյանն այլևս ունակ չէ լուծել գերիների հարցը, ուստի փորձում է մեղքը բարդել գերիների վրա.
«Ակնհայտ է, թե Նիկոլ Փաշինյանն իր խմբակով գերիների հարցը ո՞ւր է փորձում տանել:Ունակ չլինելով այս հարցը լուծել՝ իրենք փորձում են արժեզրկել, ուզում են ցույց տալ՝ գերիներն են մեղավոր, որ գերի են ընկել, հիմա նրանց վրա դավաճանի պիտակ կկպցնեն, ինչ է թե գերիների խնդրից ազատվեն: Էլ ի՞նչ անի այս մարդը, որ հասկանան՝ սա պատուհաս է մեր ազգի գլխին»,-ասել է Հակոբյանը և հավելեց.
«Երեկ Նիկոլ Փաշինյանը հայտարարեց նաև, որ չկրակելու հրաման երբևէ չի եղել, քանի որ դա դիտվել է դավաճանություն, այդ դեպքում հարց՝ մայիսի 12-ին ադրբեջանական զինուժն անարգել մտավ մեր սուվերեն տարածք և ամրապնդվեց՝ ով՞ դատվեց չկրակելու համար, գոնե մեկ քրգործ կա հարուցված այդ մասով; Այնքան է սուտ խոսել, որ ինքը խճճվել է իր ստերի մեջ»:
Վահե Հակոբյանը նաև ահազանգեց, որ Սյունիքում հայաթափման վտանգ կա, քանի որ բնակիչների մոտ տագնապային և անորոշ վիճակ է.
«Հասարակության մոտ տագնապային վիճակ է, քանի որ չգիտեն՝ վաղն ի՞նչ է լինելու: Կապանում կան գյուղերը, որոնք կտրված են հիմնական ճանապարհից: Այդտեղ ապրում է շուրջ 600 հոգի, նորմալ գործող գյուղեր են: Ժամանակի ընթացքում այդտեղի բնակիչները դուրս են գալու իրենց բնակավայրերից, իսկ գյուղերը հայաթափվելու են»,-ասել էՎահե Հակոբյանը:
