Ճակատենի համար այլընտրանքային ճանապարհ է կառուցվում. պատգամավոր Դավիթ Դանիելյան
Գորիս-Կապան ավտոճանապարհի Որոտանի հատվածում մաքսակետ տեղադրելուց հետո երեկ գիշեր ադրբեջանցիները վագոն-տնակ են տեղադրել նաեւ Կապան Ճակատեն ավտոճանապարհին: Եթե Ճակատենի ճանապարհը փակվի, Կապանի գյուղերի բնակիչները ստիպված կլինեն շրջանցել Մեղրիով: Սակայն ուշագրավ է, որ պաշտոնական որևէ աղբյուր այս տեղեկությունը ո՛չ հերքել է, ո՛չ հաստատել:
Կապանի Քաղպայմանագրի թեկնածու, գործող պատգամավոր Դավիթ Դանիելյանը քիչ առաջ լրագրողների հետ զրույցում ասաց, թե Ճակատենին համար այլընտրանքային ճանապարհ է կառուցվում, թե որն է այդ ճանապարհը, չմանրամասնեց, ասաց միայն, որ նոյեմբերի 9-ից հետո հաշվի առնելով վտանգները, իր խոսքով բոլոր ճանապարհների համար այլընտրանքային ճանապարհներ են կառուցվում, նա հորդորեց նաեւ, որ Ճակատենի հետ կապված գործընթացներին հետեւել պաշտոնական լրատվությամբ. «Ես ինֆորմացված եմ, որ այնտեղ տնակ է տեղադրվել եւ որեւէ այլ գործողություն չի իրականացվել: Այս մասով կխնդրեմ հետեւել պաշտոնական լրահոսին», - ասաց Դանիելյանը:
Ինչ վերաբերում է Գորիս-Կապան ավտոճանապարհին ադրբեջանցիների կողմից մաքսակետ տեղադրելու փաստին Դանիելյանը նշեց.
«Ես լսել եմ կառավարության անդամների հայտարարությունները, որ այս անցագրային ճանապարհին անցնելը այսինքն անցակետ տեղադրելը կապված է ՀՀ շահերից չբխող որոշումներին դեմ գնալու հետ, և հատկապես «միջանցքին» չհամձայնվելու և ես վստահ եմ, որ ցանկացած սյունեցի այդ քայլը ողջունում է, որ միջանցք չպետք է լինի»,-ասաց նա։
