Բեռլինում ՌԴ դեսպանության շենքի մոտ ռուս դիվանագետի դի են հայտնաբերել
Բեռլինում գտնվող ռուսական դեսպանատան դիմաց հայտնաբերվել է ռուս դիվանագետի դիակ: Այս մասին գրում է գերմանական Der Spiegel պարբերականը, վկայակոչելով Բեռլինի ոստիկանության տրամադրած տեղեկատվությունը: Նախնական տեղեկությունների համաձայն, դիվանագետը ընկել է պատուհանից: Նրա դիակը հայտնաբերվել է դեսպանատան շենքի մոտ` Բերենշտրասե փողոցում:
Ուշագրավ է այն, որ դիակը հայտնաբերվել է դեռ հոկտեմբերի տասնիննին, սակայն այդ մասին գերմանական մամուլը սկսել է գրել այժմ: Նախնական տեղեկությունների համաձայն, պատուհանից ընկած եւ մահացած ռուս դիվանագետը եղել է երեսունհինգ տարեկան: Քննչական գործողությունները դիվանագետի մահվան կապակցությամբ, շարունակվում են: Վերջինս 2019 թվականի ամառվանից հավատարմագրված էր Բեռլինի ռուսական դեսպանատանը որպես երկրորդ քարտուղար:
