Ատեստավորումը չանցած ուսուցիչների նկատմամբ որևէ բացասական հետևանք նախատեսվա՞ծ է. Քյարամյան
Ատեստավորումը չանցած ուսուցիչների նկատմամբ որևէ բացասական հետևանք նախատեսվա՞ծ է։ Կառավարության նիստում ՀՀ վարչապետից և ԿԳՄՍ նախարարից այս մասին հետաքրքրվեց Քննչական կոմիտեի նախագահ Արգիշտի Քյարամյանը։
«Եթե նախատեսված չէ, արդյոք չարժի՞ ակնհայտ ցածր արդյունքներ գրանցած ուսուցիչների համար որոշակի բացասական հետևանքներ առաջացնել»,-նշեց ՔԿ նախագահը։
ՀՀ վարչապետ Նիկոլ Փաշինյանն ասաց, որ վերջնարդյունքում բացասական հետևանքներ կլինեն, բայց մարդիկ պետք է ունենան 2-րդ, 3-րդ և գուցե 4-րդ հնարավորությունը, որից հետո արդյունքները կամփոփեն։
«Որակավորումը չհաստատած որևէ ուսուցիչ չպետք է մեր դպրոցում աշխատի։ Սա է մեր ռազմավարական նպատակը, բայց մենք հիմա չենք ուզում ասել, որ թեստը չանցաք, շնորհակալություն, ցտեսություն։ Կլինեն 2-րդ և 3-րդ փորձերը, և դրանից հետո նրանք, որոնք որակավորումը չեն հաստատի, բնականաբար հանրակրթական ոլորտում չենք կարող թույլ տալ, որ աշխատեն»,-ասաց Նիկոլ Փաշինյանը։
