Վրաստանում ազդարարում են զանգվածային ակցիայի մասին՝ ի պաշտպանություն Սահակաշվիլիի
Վրաստանի նախկին նախագահ Միխայիլ Սահակաշվիլիին ազատ արձակելու պահանջով բողոքի զանգվածային ցույցը տեղի կունենա Թբիլիսիի Ազատության հրապարակում՝ հոկտեմբերի 14-ին, Թբիլիսիի ժամանակով 18:00-ին, Զուգդիդի քաղաքում ցույցի ժամանակ հայտարարել է «Միասնական ազգային շարժում» կուսակցության նախագահ Նիկա Մելիան, տեղեկացնում է «Sputnik Գրուզիան»:
«Մենք անպայման պետք է հավաքվենք Թբիլիսիում, եւ մենք պետք է շատ լինենք: Հոկտեմբերի 14-ին, ժամը 18:00-ին մենք պետք է լինենք այնքան, որքան չենք եղել վերջին 10 տարում: Եւ մեր հավաքի հիմնական պատճառը մեր ցանկությունն ու պարտքն է, որ Միխայիլ Սահակաշվիլին չլինի այնտեղ, որտեղ նրա տեղը չէ»,- ասել է Մելիան:
Նա ցույցի է հրավիրել բոլոր կուսակցություններին եւ կոչ է արել կողմնակիցներին չնեղանալ նրանցից, ովքեր կհրաժարվեն գալ:
«Դա նրանց իրավունքն է, եւ նրանք կարող են անել այն, ինչ ցանկանում են»,- նշել է նա:
Սահակաշվիլին Վրաստանում ձերբակալվել էր հոկտեմբերի 1-ին, այժմ նա գտնվում է Ռուսթավի քաղաքի բանտում:
