Ունենք Հայաստանի անձնագիր, սակայն որևէ իրավունք չունենք․ հադրութցիների բողոքի ակցիան՝ կառավարության առջև

Հադրութցիները կառավարության առջև բողոքի ակցիա են անում` նրանք պահանջում են լուծել ինչպես բնակարանային, այնպես էլ իրենց կարգավիճակի հարցը։

«Մենք փաստացի տեղահանված ենք, ունենք ՀՀ անձնագիր, սակայն ՀՀ քաղաքացի չենք համարվում։ Ունենք պարտականություններ, սակայն որևէ իրավունք չունենք, այսինքն` չգիտենք, թե ինչ կարգավիճակ ունենք, ովքեր ենք։ Բացի այդ, շուտով ձմեռ է գալիս, և բնակարան տրամադրելու հարցում էլ որևէ տեղաշարժ չկա»,–ասաց հադրութցիներից մեկը։

Տղամարդը հավելեց` ՀՀ անձնագիր 90-ականների վերջին են ստացել, և հիմա որևէ հադրութցի չգիտի, թե ինչ է լինելու իր ճակատագիրը։

Հադրութցիները հայտնեցին` պատկան մարմինների շատ ներկայացուցիչների հետ են հանդիպել, սակայն իրենց խնդիրներն այդպես էլ լուծում չի ստանում։

Մեկ ուրիշ հադրութցի էլ նշեց, որ նույնիսկ չեն հաշվառել` քանի տեղահանված հադրութի բնակարանային խնդիր ունի։

«Սեպտեմբերի 1-ի դրությամբ 2500 հադրութցի էր լքել ՀՀ–ն, իսկ վերջին մեկ ամսում այդ թվին ևս 500 մարդ է ավելացել։ Եթե մեր խնդիրները չլուծվեն, ես էլ կարտագաղթեմ` բա ի՞նչ անեմ։ Ձմեռվա բերան ուղղակի հրաժարվում են մեզնից»,–ասաց տղամարդը։

Նրանք ասում են` որևէ հույս չունեն պատկան մարմիններից, հատկապես կառավարությունից։

Հադրութցիներն ավելի վաղ կառավարությանն ուղղված նամակ են հղել, որտեղ արծարծված է եղել բնակարանային խնդրի հարցը և այժմ կառավարությունից պատասխան են պահանջում։