Թուրքիայի պաշտպանության նախարարը խոսել է «տարածաշրջանում խաղաղության և կայունության» մասին
Վրաստանում Ադրբեջանի հետ անցկացվող զորավարժությունները նշանակալի են նման կարևոր տարածաշրջանի համար, ինչպիսին Կովկասն է, և օգտակար կլինեն զինված ուժերի համար։ Այս մասին ասել է Թուրքիայի պաշտպանության նախարար Հուլուսի Աքարն ադրբեջանական Report-ին տված հարցազրույցում:
Նա Թուրքիայի, Ադրբեջանի և Վրաստանի պաշտպանության նախարարների հանդիպումը լավ հնարավորություն է անվանել՝ հարաբերությունների քննարկման ու հեռանկարների գնահատման տեսանկյունից։ Աքարը հայտնել է, որ հանդիպմանը նաև քննարկվել է տարածաշրջանում խաղաղության ու կայունության պահպանման հարցը։ «Այս տարածաշրջանը կարևոր է տարբեր տեսանկյուններից, նավթագազային խողովակաշարերի տեսանկյունից։ Դրա համար ոչ միայն մեզ, այլև տարածաշրջանի բոլոր երկրների համար կարևոր է, որ իշխի խաղաղությունն ու կայունությունը»,- ասել է թուրք նախարարը։
