Ես ասում եմ, որ ամեն դղյակի քարի մեջ զինվորի ճակատագիր է, դա իրողություն է․ Քոչարյան

Բոլորս էլ հետաքրքրված ենք, որպեսզի ճշմարտությունները բացահայտվեն: Բանակին վերաբերվող որևէ մութ դրվագ էջ չպետք է լինի: Կոռուպցիան պետք է ոչնչացնել: Երբ ես ասում եմ, որ ամեն դղյակի քարի մեջ զինվորի ճակատագիր է, դա իրողություն է: Եթե այդ քարը դրված է և պաշտոնյան,, հատկապես գեներալիտետին է վերաբերվում, որևէ բացատրություն չի տալիս, ապա դա բանակից է դուրս եկել, իսկ դա նշանակում է,սպառազինության վրա ազդեցություն, այն սպառազինության, որը պետք է կրակեր՝ հակառակորդին լռեցնելու համար: Այս մասին այսօր լրագրողների հետ զրույցում ասաց ԱԺ պաշտպանության և անվտանգության հարցերի հանձնաժողովի ղեկավար Անդրանիկ Քոչարյանը՝ անդրադառնալով ՊՆ նախկին նախարար Դավիթ Տոնոյանի դեմ հարուցված քրեական գործին:

Անդրանիկ Քոչարյանը վսհտահեցրեց, որ իշխանությունը քրեական գործեր հարուցելով խնդիրներ չի լուծում.

«Դուք պետք է ուրախանաք, որ իշխանությունները կոմպլեքս չունեն որևէ քրեական գործով որևէ մեկի նկատմամբ հետևողական խնդիր լուծելու»,- նշեց Քոչարյանը։

ՔՊ-ական պատգամավորն անդրադարձավ նաև ՀՀ երկրորդ նախագահ Ռոբերտ Քոչարյանի հայտարարությանը, որ 44-օրյա պատերազմը սկսվել է իշխանության կողմից բանակցությունները տապալելու և տգետ քաղաքականության արդյունքում, և ավարտվել՝ գործարքով.

«Ռոբերտ Քոչարյանին ես մեկնաբանելու ցանկություն չունեմ, որովհետև Ռոբերտ Քոչարյանը ոսկեղենիկ հայերենով այնպիսի դարակազմիկ մտքեր է ասում, որի մասին խոսելը պարզապես ծիծաղելի է, ես չեմ խոսելու դրա մասին: Քանի որ ես էլ եմ Քոչարյան ազգանունը կրում, ես միշտ ասում եմ, ինձ դիմեք՝ Անդրանիկ Քոչարյան, Ռոբերտ Քոչարյանը թող մնա իր անվան տիրույթում»,-ասաց Անդրանիկ Քոչարյանը:

Իսկ թե ի՞նչ գործաքի մասին է խոսել Ռոբերտ Քոչարյանը, ՔՊ-ական պատգամավորն ասաց.

«Եթե ինքը գիտի, որևէ մեկը չի խանգարում իրեն գնալ և նախաքննական մարմնին հայտնել»: