Ադրբեջանա-թուրքական զորավարժությունները պաշտոնական Ստեփանակերտը համարում է նոր մարտահրավեր. Լուսինե Ավանեսյան
Պաշտոնական Ստեփանակերտը Արցախի՝ Ադրբեջանի կողմից բռնազավթված տարածքներում իրականացվող ցանկացած գործողություն՝ այդ թվում թուրք-ադրբեջանական համատեղ զորավարժությունները, համարում է նոր մարտահրավեր: Այս մասին NEWS.am-ի հետ զրույցում հայտնել է Արցախի Հանրապետության նախագահի մամուլի քարտուղար Լուսինե Ավանեսյանը:
«Ոչ միայն այդ զորավարժությունները, այլ նաեւ Արցախի՝ Ադրբեջանի կողմից բռնազավթված տարածքներում կատարվող ցանկացած իրադարձություն դիտարկում ենք որպես նոր մարտահրավեր, որին պետք է պատրաստ լինել, եւ այդ սկզբունքի հիման վրա էլ կառուցվում են բոլոր այն քայլերը, որոնք ձեռնարկվում են Արցախի իշխանությունների կողմից»,- նշել է Ավանեսյանը:
Արցախի նախագահի խոսնակի փոխանցմամբ՝ նշված գործընթացների առնչությամբ որոշակի քննարկումներ տեղի են ունենում Արցախում տեղակայված ռուս խաղաղապահ առաքելության հրամանատարության հետ, բայց ձեռնպահ մնաց մանրամասներ հայտնելուց:
