Վարչապետն ասաց՝ չի կարող մեզ ընդունել, այստեղ կսպասենք այնքան ժամանակ, մինչև ընդունի. ռազմագերու հարազատ

Եկել ենք Կառավարության դիմաց, որ հասկանանք՝ ինչ ճակատագիր է սպասվում մեր գերեվարված հարազատներին և նրանց վերադարձի մասին տեղեկություն ստանանք: Այս մասին այսօր՝ օգոստոսի 9-ին,  Կառավարության դիմաց ակցիայի ժամանակ ասաց գերեվարված հայ զինծառայողի եղբայրը՝ Տիգրան Ամբարդարյանը:

Նա խոսքով՝ Նիկոլ Փաշինյանը հրաժարվել է հանդիպել գերիների հարազատների հետ՝ պարզաբանելով, թե այսօրվա օրակարգում նման հարց չկա. «Մի 40 րոպե առաջ վարչապետի խորհրդականը դուրս եկավ և ասաց, որ վարչապետը չի կարող մեզ ընդունել իր մոտ: Սպասելու ենք այստեղ այնքան ժամանակ, մինչև ընդունի մեզ: Մենք 8 ամիս սպասել ենք, բայց այսօր եկել ենք այն եզրահանգման, որ այստեղից պետք է տեղ չգնանք, ու մեր տղաներին բերենք հասցնենք մեզ մոտ: «Միշտ մեզ հավաստիացրել են, թե գերիներին վերադարձնելու ուղղությամբ գործընթաց է գնում, բայց տեսնում ենք, որ այդ գործընթացի արդյունքում մեր տղաները դատապարտվեցին 6 տարվա ազատազրկման»,- ասաց ռազմագերու եղբայրը: