81 գլուխ անասուն ունենք, որոնք անցել են սահմանից այն կողմ․ Գեղարքունիքի մարզպետ
Մենք 81 գլուխ անասուն ունենք, որոնք անցել են այն կողմ: Այդ ուղղությամբ մենք չունենք վերջնական լուծում, կան բանակցություններ: Այս մասին մամուլի ասուլիսի ժամանակ հայտարարեց Գեղարքունիքի մարզպետ Գնել Սանոսյանը:
Սանոսյանը նշեց, որ այդ անասունները պատկանում են 5 ընտանիքի. «Մենք նրանց հետ աշխատում ենք, հանդիպել ենք: Այս ընթացքում նաև որոշակի փոքր ֆինանսական աջակցություն ենք ցուցաբերել: Հիմա պետք է սպասենք, եթե անասունները հետ կգան, ուրեմն կգան, եթե ոչ՝ պետությունն ինչ-որ բան կնախաձեռնի»:
Արոտավայրերի մասով մարզպետն ասաց, որ պատերազմից հետո որոշակի խնդիրներ ունեն. «Կան վայրեր, որտեղ որոշակի դժվարություններ կան արոտավայրերը, խոտհարկերն օգտագործելու մասով, հատկապես մայիսի 13-ից հետո:
Բայց նաև ունենք վայրեր, որտեղ մեր բանակային կորպուսը որոշակի լրացուցիչ ուժեր է կենտրոնացնում, որպեսզի բնակիչներն իրենց ավելի ապահով զգան»:
Սանոսյանը նշեց նաև, որ բարձրադիր վայրերում աշխատանքները դեռ չեն սկսել՝ հույս հայտնելով, որ մինչ դրանց սկսելը խնդիրները կկարգավորվեն ու բնակիչները կկարողանան հանգիստ կատարել իրենց աշխատանքը:
