Գյումրիում Խաչատուր Սուքիասյանի մոտ 5-6 կարմիր բերետավորները մեզ վրա են հարձակվել․ «Հայաստան» դաշինքի համակարգող
Շիրակի մարզի Գյումրի քաղաքում ժամը 20։20-ի սահմաններում Նիկոլ Փաշինյանի գլխավորությամբ ՔՊ-ականներին ուղեկցող կարմիր բերետավորները հարձակվել են «Հայաստան» դաշինքի շտաբի անդամների վրա։ Այս մասին «Հրապարակին» ասել է «Հայաստան» դաշինքի մարզային համակարգող, «Վերածնվող Հայաստան» կուսակցության մարզային գրասենյակի ղեկավար Կարապետ Պողոսյանը։
«Խաչատուր Սուքիասյան մոտ 5-6 կարմիր բերետավորները մեզ վրա են հարձակվել։ Գյումրիում դաշինքի շտաբի դիմաց են հարձակվել։ Սարքեցին այս ամեն ինչը։ Ինչ-որ սադրիչ Փաշինյանի ուղղությամբ գոռաց՝ «դավաճաններ», ընդ որում այն պահին, երբ Գռզոն առաձնացված առաջ էր գնում ու, ոնցոր, իշմարներ էր տալիս», - մանրամասնեց Կարապետ Պողոսյանը։
Նա հավելեց, որ բերետավորների խոսքերից, բարբառից, հայհոյաքներից հասկացել է, որ նրանք գյումրեցի չեն։
«Ու առհասարակ ,գյումրեցի ոչ մի տղա՝ կապ չունի ոստիկան է, թե ինչ է, իրեն թույլ չի տա նման լկտի պահվածք՝ գիտենալով, որ դրա պատասխանը ստանալու է։ Երևանից եկած ինչ-որ բերետավորներ էին։ Շատ հաճախ էլ մամուլով շրջանառվում էր, չէ՞, որ Գռզոն ունի համապատասխան բերետավորներ, որոնք նման չակերտավոր պատժիչ գործողություններ են փորձում իրականացնել։ Ես վստահ եմ, որ դրանցից էին», - ընդգծեց նա։
Պողոսյանն ասաց, որ կրծքի հատվածում հարձակման հետևանքով հարված է ստացել ու գնում է հիվանդանոց։
