Այսօր ավելի շատ հնարավորություն եմ տեսնում Արցախի հարցը մեր ուզածով լուծելու համար․ Փաշինյան
ՀՀ վարչապետի ժամանակավոր պաշտոնակատար, «Քաղաքացիական պայմանագրի» վարչապետի թեկնածու Նիկոլ Փաշինյանը հայտարարել է, որ այսօր ավելի շատ հնարավորություններ է տեսնում ղարաբաղյան հարցը հայկական կողմի պատկերացումներին համապատասխան լուծելու համար, քան, օրինակ, չորս տարի առաջ: Արագածոտնի մարզի Արագածավան գյուղի բնակիչների հետ քարոզարշավի շրջանակներում կայացած հանդիպման ժամանակ ասաց Փաշինյանը։
Նրա խոսքով ՝ ինքն առաջին հայացքից տարօրինակ բան է ասում։ Բայց իրականում «ինքը գիտի, թե ինչ է ասում»: Խնդիրն այն է, որ որոշակի հանգամանքներից ելնելով չի կարող մանրամասներ հայտնել։ Նույն հանգամանքներից ելնելով` Փաշինյանը 2018 կամ 2019 թվականներին չէր կարող բացահայտել բանակցային գործընթացի մանրամասները։
«Կարող եմ միայն ասել, որ ԵԱՀԿ Մինսկի խմբի համանախագահության շրջանակներում արձանագրվել է Ղարաբաղի վերջնական կարգավիճակը ճշգրտելու համար բանակցային գործընթացի վերականգնման անհրաժեշտությունը։ Եվ մենք պատկերացնում ենք, որ այս բոլոր իրադարձություններից հետո «անջատում հանուն փրկության» բանաձևի իրագործման հնարավորություններն էականորեն մեծացել են։ Մեզ հարկավոր է հետևողական աշխատանք այս ուղղությամբ», - ասել է վարչապետի պաշտոնակատարը։
