Շուռնուխցի Աշխարհապետի՝ Արարատ Աղաբեկյանին, տեղափոխել են ձերբակալվածների պահման վայր. փաստաբան. ArmDaily .am

Շուռնուխցի Աշխարհապետի՝ Արարատ Աղաբեկյանի հոսպիտալացման մասին լուրերը չեն համապատասխանում իրականությանը։ Այս մասին ArmDaily.am-ի հետ զրույցում ասաց Աղաբեկյանի փաստաբան Արմեն Մելքոնյանը։ 

«Այս պահին Արարատ Աղաբեկյանից դեռևս նորություն չունեմ, 12.30-ից հետո երևի կլինեն նորություններ։ Աշխարհապետն այժմ գտնվում է ձերբակալվածների պահման վայրում, վերջին անգամ տեսել եմ գիշերը ԶՊՎ-ում»,-ասաց փաստաբանը։ 

Մելքոնյանը տեղեկացրեց, որ Աղաբեկյանին չեն հոսպիտալացրել, նա շատ վատառողջ էր, թոքերն ախտահարված են և մի քանի օր ինքնամեկուսացված է եղել տանը՝ անկողնային վիճակում։ 

«Ինքն ընդհանրապես տանից դուրս չի եկել, տանը պառկած է եղել, այդ ձևով իրեն ապօրինի բերման են ենթարկել և այդ անմարդկային վերաբերմունքը, որ դրսևորվել էր Արարատի նկատմամբ՝ ուղղակի ապշած եմ։ Մի մարդու, ով երեք պատերազմ է անցել, ներդրում ունի, ես չգիտեմ այդ անձինք, որ Արարատին այդպես են բերման ենթարկել, իրենց ծնողներն ու երեխաները իրենց հարգո՞ւմ են»,-ասաց Արմեն Մելքոնյանը։ 

ArmDaily.am-ի հարցին, թե անհրաժեշտություն չի եղել արդյոք, որպեսզի Աշխարհապետին հիվանդանոց տեղափոխեն, վերջինս ասաց, որ վարույթն իրականացնող մարմնին են ասել իրենց եզրակացությունը Շտաօպգնության բժիշկները, իսկ իրեն ոչ մի բան չեն ասել։