Ինչու են ռուս պատվիրակները դեմ և ձեռնպահ քվեարկել՝ հայ ռազմագերիների հարցն ընդգրկող օրակարգին. ArmDaily. am

Ինչպես արդեն հայտնել ենք, հայ ռազմագերիների հարցը ընդգրկվել է ԵԽԽՎ գարնանային նստաշրջանի օրակարգում, որն անցկացվում է հիբրիդային ձևաչափով:

ԵԽԽՎ-ն որոշել է հրատապ քննարկումներ անցկացնել «Ալեքսեյ Նավալնու ձերբակալումն ու կալանավորումը 2021թ. հունվարին» եւ «Ժողովրդավարական ինստիտուտների գործունեությունը Թուրքիայում» թեմաներով, ինչպես նաեւ շարունակական քննարկումներ անցկացնել «Covid-ի անձնագրեր կամ վկայագրեր. հիմնարար իրավունքների եւ իրավաբանական հետեւանքների պաշտպանություն» ու «Հայ ռազմագերիներ, այլ գերիներ եւ տեղահանված անձինք» թեմաներով:

Օրակարգին կողմ է քվեարկել 93 պատվիրակ, դեմ՝ 21, ձեռնպահ՝ 18:

Համացանցում ֆեյսբուքահայերն ակտիվորեն քննարկում են քվեարկության արդյունքները: Մասնավորապես նշվում է, որ 21 դեմ քվեարկած պատգամավորներից 5-ը ռուս են, 8-ը թուրք են, 6-ն ադրբեջանցի են, 1-ը սերբ է և1-ը հունգար: Իսկ մնացած 7 ռուս պատգամավորը քվեարկել են ձեռնպահ։ 

Հայ օգտատերերը տարբեր գրառումներ են անում՝ մեղադրելով ռուս պատվիրակներին օրակարգին կողմ չքվեարկելու համար: Շատերը նույնիսկ այդ քայլը դավաճանություն որակեցին: «Եթե որևէ մեկը կնշի, որ «Ռուսաստանը մեր բարեկամն է», թող հիշի այսօրվա քվեարկությունը»,- նշում են օգտատերերը:

Մինչդեռ կա կարծիք, որ ռուս պատվիրակների՝ դեմ քվեարկության պատճառը ամենևին էլ կապ չունի հայ գերիների հարցի հետ: Մասնավորապես, օրակարգում ընդգրկված են եղել նաև այլ հարցեր, որոնք Ռուսաստանի շահերը չեն սպասարկում, իսկ օրակարգը քվեարկության է դրվում ոչ թե առանձին հարցերով, այլ ամբողջությամբ, ինչն էլ եղել է ռուսների դեմ կամ ձեռնպահ քվեարկության պատճառը:

[a8f172371e3e46ef0baa4fedcf7b7a34.png]