ՏԵՍԱՆՅՈՒԹ. «Յանդեքսի» տնօրենը վարորդի անունից ներողություն է հայցել արցախցի կանանց վիրավորանք հասցնելու համար

Իրավապաշտպան Ռուբեն Մելիքյանն այսօր ֆեյսբուքյան ուղիղ եթերի ժամանակ խոսեց արցախցիների նկատմամբ՝ հայաստանցիների վատ վերաբերմունքի մասին։ Իրավապաշտպանը, մասնավորապես, անդրադարձավ օրեր առաջ տեղի ունեցած միջադեպին, երբ տաքսու վարորդը ավտոմեքենայից իջեցրել էր արցախցի երկու աղջիկների և ասել՝ գնացեք ձեր Ղարաբաղ: Ըստ Ռուբեն Մելիքյանի՝ այսօր տեղի է ունենում ներազգային ռասիզմ, որը պետք է կանխվի:

«Մենք Ոստիկանություն էինք դիմել, նրանք շատ նորմալ վարույթ են իրականացնում, մենք տեղյակ ենք, որ նրանք հնարավոր և անհրաժեշտ գործողությունները կատարում են: Հանցագործության մասին հաղորդումը ներկայացվել է ՀՀ Քրեական օրենսգրքի 143-րդ հոդվածով: Այս հոդվածը քիչ կիրառվող հոդված է, բայց այն պետք է կիրառվի, որպեսզի մարդիկ հասկանան, որն իրենց քայլը պատժելի արարք է: Մենք դեռ սպասում ենք պատասխանին, թե արդյոք կհարուցվի քրեական գործ, թե ոչ»,– ասաց նա:

«Այսպիսի հարցերին պետք է լուրջ վերաբերվել: Ես խոսել եմ աղջիկների հետ, աղջիկները որևէ պահանջ արդեն չունեն Yandex տաքսիից, քանի որ ճիշտ ժամանակին համարժեք արձագանք են ստացել ընկերությունից»,- ասաց նա և հավելեց, որ ընկերության տնօրենը ներողություն է խնդրել միջադեպի համար և տվյալ վարորդին ազատել է աշխատանքից:

Իրավապաշտպանը նշեց, որ այս հարցը պետք է պարտադիր հանրայնացվեր, քանի որ հաճախ լինում են նման դեպքեր, որոնք, սակայն, չեն բարձրաձայնվում և սա է պատճառը, որ այսօր իրավիճակն այսքան սուր է:

«Խնդիրը թաքցնելը խնդրի ծավալը մեծացնելու լավ հնարավորություն է: Մեզ մանկուց սովորեցրել են, որ մենք լավն ենք, թշնամին է մեզ կոտորել, սակայն վերջին պատերազմը մտածելու տեղիք տվեց, մենք մեզ խաբել ենք երկար տարիներ, որը ոչ թե դրական արդյունք է տվել, այլ ճիշտ հակառակը: Մենք հայելու մեջ նայել ենք, տեսել ենք լրիվ այլ իրականություն, ինչպես օրինակ եղավ 44-օրյա պատերազմի ժամանակ «արծրունհովհաննիսյանական ստի» հետևանքները»:

Վերջինս պնդեց, որ այսօր պետք է հետևողական լինենք ներազգային խտրականության դեպքերի նկատմամբ, որպեսզի այն չսրվի և անհրաժեշտություն չլինի հարցին այլևս անդրադառնալ: