«Սայաթ-Նովան սփյուռք է՞. Վրաստանի էթնիկ փոքրամասնություններն՝ ընդդեմ իշխանության որոշումների
Վրաստանի իշխանություններն արդեն օրեր շարունակ էթնիկ փոքրամասնությունների կողմից մեղադրվում են խտրականություն ցուցաբերելու մեջ: Սրա պատճառը խորհրդարանի Սփյուռքի հանձնաժողովին կից էթնիկ փոքրամասնությունների հարցերով զբաղվող խորհուրդ ստեղծելու որոշումն է: Այս մասին գրում է Ալիք Մեդիան:
«Ես սփյուռք չեմ» խորագրով սոցիալական ցանցերում ֆլեշմոբ է մեկնարկել դեռևս շաբաթվա սկզբին: Անկախ Նովրուզ Բայրամի շուրջ զարգացումներից Վրաստանում բնակվող էթնիկ փոքրամասնությունները նաև դժգոհում են Խորհրդարանի Սփյուռքի հանձնաժողովին կից էթնիկ փոքրամասնությունների հարցերով զբաղվող խորհրդի ստեղծումից: Խորհրդի գործունեությունը կապված է լինելու Վրաստանի քաղաքացի էթնիկ փոքրամասնությունների առավել ինտեգրման հետ, սակայն վերջիններիս զարմացրել է՝ ինչո՞ւ սփյուռքի հանձնաժողովին կից:
Թեմայի հետ կապված մարտի 18-ին Վրաստանի խորհրդարանի հարակից տարածքում էթնիկ փոքրամասնությունները բողոքի ցույց են անցկացրել: Ցույցի մասնակիցներից աչքի էր ընկել «Սայաթ-Նովան սփյուռք է՞» գրությամբ պաստառով երիտասարդը: Մկրտիչ Շահդինարյանն է, միացել է «Սալամ» կազմակերպության նախաձեռնությանը:
Մկրտիչն ասում է՝ «Շատ ափսոս, թվում է «Վրացական երազանքը» չի ընկալում մեր ներդրած աշխատանքը, ջանքերն ու մշակութային բաժինը երկրի զարգացման գործում: Կարծես պատմությանը չտիրապետեն»,- ասել է Շահդինարյանը:
