Բայդենի վարչակազմը Չինաստանը համարում է «ամենամեծ երկարատեւ սպառնալիքը ԱՄՆ ազգային անվտանգության համար»
Նախագահ Բայդենի պետքարտուղար Թոնի Բլինքենը եւ Սպիտակ տան ազգային անվտանգության հարցերով խորհրդական Ջեյք Սալիվանը կարծում են, որ Չինաստանը «Միացյալ Նահանգների համար ազգային անվտանգության ամենամեծ սպառնալիքն է» ներկայացնում: Այս մասին պաշտոնյաների հետ խոսելուց հետո Fox News-ին տված հարցազրույցում ասել է հանրապետական կոնգրեսական Մայքլ Մաքքոլը՝ նշելով, որ Չինաստանի հանդեպ նրանք «այլ մոտեցում կունենան», քան Թրամփի վարչակազմը:
Ներկայացուցիչների պալատի արտաքին հարաբերությունների հանձնաժողովում գլխավոր հանրապետական Մաքքոլն ասել է, որ զրույցի ընթացքում Բլինքենը եւ Սալիվանը նշել են, որ «իրենց կարծիքով՝ Չինաստանը ամենամեծ երկարատեւ սպառնալիքն է ներկայացնում ԱՄՆ-ի ազգային անվտանգության համար»:
Այս ամսվա սկզբին MSNBC-ին տված հարցազրույցում Բլինքենն ասել էր, որ «անկասկած է, որ Չինաստանը ամենալուրջ խնդիրն է» ԱՄՆ-ի համար՝ նշելով, որ Բայդենի վարչակազմը պետք է Չինաստանին մոտենա «ուժի, ոչ թե թուլության դիրքերից»:
Թրամփի վարչակազմի բարձրաստիճան պաշտոնյաները նախազգուշացրել են այն սպառնալիքի մասին, որը Չինաստանը ներկայացնում է ԱՄՆ-ի համար: Դեկտեմբերին ազգային հետախուզության նախկին տնօրեն Ջոն Ռեդթքլիֆը նույնպես հայտարարել էր, թե Չինաստանը «մեր ազգային անվտանգության ամենամեծ սպառնալիքն է» մի շարք հարցերում, այդ թվում՝ ռազմական, տնտեսական, տեխնոլոգիական, կիբեռտարածության եւ 5G հեռահաղորդակցության:
Մաքքոլը մտահոգություն է հայտնել, որ Բայդենի վարչակազմը ցանկանում է «ավելի բաց լինել Չինաստանի համար»՝ մատնանշելով Փարիզի կլիմայի համաձայնագրին վերադառնալու Բայդենի որոշումը:
«Ես մտավախություն ունեմ, որ նրանք կարող են փափուկ դիրքորոշում ունենալ Չինաստանի հանդեպ, որպեսզի նրանցից որոշակի իրեր ստանան, որպեսզի ստիպեն նրանց զիջումներ անել, երբ բանը հասնում է Փարիզի կլիմայի համաձայնագրին»,- պարզաբանել է Մաքքոլը: «Կարծում եմ, սակայն, որ դա կլինի մեր արտաքին քաղաքական դիրքորոշման թուլացումը Չինաստանի Կոմունիստական կուսակցության նկատմամբ»:
«Թրամփն իմ կյանքում առաջին նախագահն էր, ով իրոք դեմ արտահայտվեց Չինաստանի Կոմունիստական կուսակցությանը, եւ դա գրավեց նրանց ուշադրությունը»,- ասել է նա:
