ԱԺ նախագահի գործակալ լինելու հանգամանքը հերքելը կամ ապացուցելն անհնարինության շարքից է, կարծում է թուրքագետ Ռուբեն Մելքոնյանը:  «Լուրջ մեղադրանք է հնչել ու դրանից առաջ էլ այս երկրում լուրջ մեղադրանքներ են հնչել, բայց որևէ մեկը որևէ ընթացք չի ունեցել: Կարող ենք եզրակացնել, որ որդեգրված է մի ոճ, ըստ որի, անտեսում են լուրջ մեղադրանքները», - նշեց նա: 


Խոսելով ապաշրջափակման մասին՝ թուրքագետը ասել է, որ դա դրական փաթեթավորված սպառնալիք է Հայաստանի համար: Իրավիճակը Մելքոնյանը պատկերավոր այսպես ներկայացրեց՝ «երեխայի ծնունդ, որը եղել է բռնաբարության հետևանքով». 

«Այսինքն, Արցախի օկուպացիայի հետևանքով Թուրքիան հիմա էլ առաջարկում է «հնարավորություն»՝ մեկ այլ սպառնալիք սահմանների բացում, կոմունիկացիաների ապաշրջափակում: Սպառնալիք է, որովհետև հենված չէ մեր պետական արժանապատվության վրա, դիվանագիտական բնական գործընթացի արդյունք չէ՝ կապիտուլյացիոն ռեժիմի շարունակություն է, և բացի այդ՝ Թուրքիայի կողմից ոչ թե բարի կամքի դրսևորում է, այլ նույն թշնամական քաղաքականությունն է՝ այլ փաթեթավորմամբ»: 

Իսկ այդ ամենն իշխանության կողմից դրական լույսի ներքո ներկայացնելը թուրքագետը համարում է ինքնախաբեություն:  


Սպառնալիք պետությունների զորավարժությունների, ռազմական գործողությունենրի նախապատրաստման ու մյուս քայլերը պետք է ընկալվեն որպես պոտենցիալ սպառնալիք, ասուլիսում նշեց թուրքագետ Ռուբեն Մելքոնյանն՝ անդրադառնալով թուրք-ադրբեջանական զորավարժությանը: 

«Այս տարածաշրջանում շրջում է մեծ պատերազմի ուրվականը, թե այդ պատերազմը երբ կսկսվի, թիրախները ո՞ր մեծ պետությունները կլինեն՝ Իրա՞նը, թե՞ Ռուսաստանը՝ դեպքերը ցույց կտան: Բայց ամեն զարգացման պարագայում Հայաստանը մնում է թիրախ, Հայաստանը մնում է պատերազմի թատերաբեմ դառնալու վտանգի տակ», - նշեց թուրքագետը:  Այդ ամենն անտեսելը նա սխալ է համարում: 


Արցախում հայերի ցեղասպանության ժամանակ, ինչպես այլ բնակավայրերի, այնպես էլ Շուշիի բնակչությունը եղել է թիրախում,  պատմական փաստեր ներկայացրեց Ռուբեն Մելքոնյանն՝ ավելացնելով, որ Շուշիի բնակչությունը ենթարկվել է ցեղասպանությունների, նրանց պարտադրվել է արտագաղթ: 

«Բայց դա չի նշանակում, որ Շուշին կորցրել է իր հայկական դիմանկարը: Նույնպիսի արտագաղթ ու ցեղասպանություններ իրականացվել են Վանի, Մուշի, այլ տեղերի հայության դեմ: Բայց դա չի նշանակում, որ որևէ հայ բարձրաստիճան պաշտոնյա երբևէ վիճարկել է Վանի հայկական պատկանելիությունը», - նշեց Մելքոնյանը: 
Նրա խոսքով՝ այն, ինչ հնչել է ԱԺ-ում, համընկնում է ադրբեջանական դիրքորոշումներին:  Ըստ նրա՝ վերջին տարիներին տեղի ունեցող իրադարձությունները տպավորություն են թողնում, որ այդ ամենը ոչ թե պատահականություն, այլ մշակված գործընթաց է.  «Սիստեմատիկորեն հարվածում են ազգային, պետական կարևոր ինստիտուտներին»:  

Չի կարելի մեկնաբանել բացահայտ տգիտությունը, Ռուբեն Մելքոնյանն՝ անդրադառնալով Շուշիի մասին վարչապետի աղմկահարույց հայտարարության մասով գիտնականների լռությանը: 

Հիշեցնենք, որ Նիկոլ Փաշինյանը հետևյալ ձևակերպումն էր արել. «Ուզում եք ասել, որ 90 և ավելի տոկոս ադրբեջանական բնակչություն ունեցող Շուշին հայկակա՞ն է իր այդ կարգավիճակով»։ 

«Գուցե, իրենց պատվից ցածր համարեն մեկնաբանել կամ բանավիճել տգիտության շուրջ», - ասաց նա: 

Բայց մյուս կողմից էլ թուրքագետն առաջ քաշելով հանգամանքը, որ այդ հայտարարությունն արել է երկրի ղեկավարը՝ խորհրդարանական ամբիոնից, նշեց, որ դրան չարձագանքելը նույնպես բերում է որոշակ տարընթերցումների: 

«Դրա համար պետք է հստակ ֆիքսել՝ Շուշին, ինչպես նաև ամբողջ Արցախը, բուն հայկական տարածք է: Եվ քննարկել, թե Շուշին ադրբեջանաբնակ է եղել, այսինքն՝ ադրբեջանական է եղել, հեռու է պատմական օբյեկտվությունից: Շուշին ոչ միայն եղել է հայակական կարևոր բնօրրաններից մեկն, այլև կան բազմաթիվ փաստեր, որ Շուշին Անդրկովկասի կրթական կենտրոններից է եղել: Ի հայտ են եկել նաև փաստեր, որ Շուշիում ձևավորվել են հայկական կրթական որոշակի սկզբունքներ», - ներկայացրեց նա: