Հայաստանը չի հաղթում, Ադրբեջանը չի հաղթում. հաղթում է համավարակը. ՄԱԿ գլխավոր քարտուղար

ՄԱԿ գլխավոր քարտուղար Անտոնիո Գուտերեշը  հրադադարի կոչ է անում համաշխարհային խոշոր հակամարտություններում՝ նախազգուշացնելով, որ եթե ռազմական գործողությունները շարունակվեն, ապա «միակ հաղթողը կլինի համավարակը»: 

 Associated Press-ին տված հարցազրույցում  Գուտերեշն անդրադարձել է նաև ղարաբաղյան հակամարտության գոտում վերջին սրացմանը:

«Վերջին երկու շաբաթվա ընթացքում Հայաստանում COVID-19-ի դեպքերի թիվը կրկնապատկվել է, իսկ Ադրբեջանում այն աճել է 80 տոկոսով»,- ասել է նա: «Հայաստանը չի հաղթում, Ադրբեջանը չի հաղթում։ Հաղթում է COVID-19-ը: Մենք պետք է կանգ առնենք »,- ասել է նա:

Գուտերեշը նշել է, որ նույնը կարելի է ասել Լիբիայի, Եմենի, Սիրիայի, Աֆղանստանի, աֆրիկյան Սահել շրջանի եւ այլ հակամարտությունների մասին:

«Ես այստեղ եմ՝ նրանց բոլորին կոչ անելու հասկանալ, որ պատերազմում անհնար է հաղթել»,- ասել է ՄԱԿ գլխավոր քարտուղարը` հավելելով. «Միակ ճանապարհը ուժերը միավորելն է` զինադադարի, քաղաքական բանակցությունների եւ COVID-ի դեմ հաղթանակի համար: Եթե ոչ, ապա միակ հաղթողը համավարակն է»: