Պոմպեոն հայտարարել է, որ ԱՄՆ-ը կփորձի խոչընդոտել Իրանի նկատմամբ զենքի էմբարգոյի չեղարկմանը

ԱՄՆ-ը մտադիր է խոչընդոտել Իրանին զենքի մատակարարման էմբարգոյի չեղարկմանը, որի ժամկետը սպառվում է հոկտեմբերին, հայտարարել է ԱՄՆ պետքարտուղար Մայք Պոպեոն, հաղորդում է ՏԱՍՍ-ը։

«Այս պահին մենք պայքարում ենք ՄԱԿ-ում,-ասել է նա։ ԱՄՆ նախկին վարչակազմն ասում էր, որ հինգ տարի անց իրանցիները կկարողանան զենք ձեռքբերել Չինաստանից եւ Ռուսաստանից, եւ կկարողանան վաճառել սպառազինություններ։ Եթե ԱՄՆ-ը միջոցներ չձեռնարկի, ապա հոկտեմբերի 18-ին դա կարող է տեղի ունենալ։ Մենք մտադիր չենք թույլ տա դա»։

ԱՄՆ պետքարտուղարի խոսքով՝ ԱՄՆ-ի դիրքորոշումը սատարում են Պարսից ծոցի երկրները։ Բացի այդ, հավելել է նա, «ուրիշ երկրներ մասնավոր կարգով հայտարարում են ԱՄՆ-ին, որ նրանք ճիշտ ուղու վրա են»։ «Ռուսաստանն ու Չինաստանն ընտրել են այլ ճանապարհ,-հայտարարել է նա,-եւ նրանք ցանկանում են զինել Իրանին, որը սպառնում է Մերձավոր Արեւելքի եւ Եվրոպայի երկրներին»։

Օգոստոսի սկզբին ԱՄՆ-ը, դարձյալ մեղադրելով Իրանին միջուկային գործարքի մեջ, հայտարարել է, որ մտադիր է վերականգնել ՄԱԿ-ի պատժամիջոցներն ընդդեմ Թեհրանի։ Օգոստոսի 20-ին Պոմպեոն անձամբ ներկայացրել է ՄԱԿ-ի ԱԽ նախագահին համապատասխան հարցումն ամերիկյան կողմից։ Ավելի վաղ ՌԴ ԱԳՆ-ն հայտարարել էր, որ ԱՄՆ-ի նախաձեռնությունն անօրինական է եւ «անխուսափելիորեն տապալվելու է»։