Ընդհանրապես չեմ կարծում, որ ինչ-որ մեկին կարող էր ձեռնտու լինել. Պեսկովը՝ Նավալնիի թունավորման մասին

Կրեմլում որևէ պատճառ չեն տեսնում Ալեքսեյ Նավալնիի հետ կատարվածի առնչությամբ Ռուսաստանի ղեկավարությանը մեղադրանքներ ներկայացնելու մեջ: Ինչպես փոխանցում է INTERFAX.RU-ն, նման հայտարարությամբ հանդես է եկել ՌԴ նախագահի մամլո քարտուղար Դմիտրի Պեսկովը:

Պատասխանելով հարցին, թե ում կարող է ձեռնտու լինել ընդդիմադիր գործչի թունավորումը, Պեսկովը նշել է, որ չի կարող ասել: «Ընդհանրապես չեմ կարծում, որ ինչ-որ մեկին կարող էր ձեռնտու լինել: Եթե պարզապես սթափ նայենք տեղի ունեցողին, ես զգուշորեն կխոսեի ռուսական տերության հասցեին հնչող մեղադրանքների մասին: Այնուամենայնիվ, մեղադրանքներ չկան և չկա որևէ առիթ մեղադրելու համար»,- շեշտել է վերջինս:

«Մենք մտադիր չենք որևէ մեղադրանք ընդունել այս առնչությամբ»,- հայտնել է Պեսկովը՝ հավելելով, որ Կրեմլում հիմնավորում չեն տեսնում դրա պատճառով Ռուսաստանի և «Հյուսիսային հոսք-2» գազատարի դեմ պատժամիջոցներ սահմանելու համար:  

Հիշեցնենք, որ գերմանացի բժիշկները նախօրեին հայտարարել էին, որ ռուս ընդդիմադիր գործիչ Ալեքսեյ Նավալնիին թունավորել են «Նովիչոկ» խմբի նյարդակաթվածահար ազդեցության մարտական նյութով:

Հայտնի է, որ Նավալնին դեռևս գտնվում է արհեստական կոմայի մեջ բեռլինյան Charite հիվանդանոցում, ուր Օմսկի հիվանդանոցից նրան տեղափոխել էին օգոստոսի 22-ին: