Կլինի՞ ընդունելություն մանկապարտեզներում, թե՞ ոչ. ԿԳՄՍ փոխնախարարը պարզաբանում է

Մանկապարտեզների մասով առաջիկայում կկոնկրետացվի մոտեցումը, կախված հակահամաճարակային կանոնների պահպանումից՝ պարզ կլինի՝ ընդունելություն կլինի, թե ոչ։ Այս մասին լրագրողի հարցին ի պատասխան հայտնեց ԿԳՄՍՆ փոխնախարար Ժաննա Անդրեասյանը։

Նա հիշեցրեց ավելի վաղ ընդունված որոշումը, ըստ որի՝ ավագ խմբի երեխաները, հաշվի առնելով, որ ուսումնական տարվա մեկնարկը լինելու է սեպտեմբերի 15-ից, մինչ այդ հնարավորություն կունենան մանկապարտեզ հաճախելու։ Մինչ այդ կկայացվի որոշում եւ հանրությանը տեղյակ կպահեն։ Փոխնախարարն ասաց, որ եթե կլինեն թերբեռնված մանկապարտեզներ, որոնք կունենան հնարավորություն ընդունելու երեխաներին՝ առանց խախտելու հակահամաճարակային կանոնները, ապա այդ դեպքում՝ հնարավոր կլինի ընդունելություն կազմակերպել, սակայն, սա պետք է հասկանալ ըստ մանկապարտեզների եւ դրանցում ներառված թվի։

Հիշեցնենք, որ պարետի որոշման համաձայն նախադպրոցական հաստատությունում երեխաների խնամքի և կրթության գործընթացի կազմակերպումը սահմանվել է առավելագույնը 12 հոգանոց խմբերով:

Մանկապարտեզի աշխատակիցներն արդեն իսկ ցուցակագրել ու ներկայացրել են այն երեխաների ցանկը, ովքեր ցանկություն են հայտնել մանկապարտեզ հաճախել: Նրանց թիվը նախորդից մի քանի անգամ ավել է: Ստացվում է, որ եթե որոշ մանկապարտեզներում հաճախելիությունը բարձր լինի, ընդունելություն չեն կարողանա կազմակերպել։