Լոռու մարզի Վանաձոր քաղաքում  այսօր՝ հուլիսի 30-ին, տեղի է ունեցել ՀՀ հյուսիսարևելյան ուղղությամբ տեղակայված զորամասերից մեկի մարտական դիրքում, հակառակորդի դիպուկահարի  կրակոցից զոհված պայմանագրային զինծառայող 29-ամյա Աշոտ Միքայելյանի հոգեհանգիստը, հայտնում է News.am-ը: 

Հոգեհանգստի արարողությանը ներկան են եղել նաև ՀՀ ԱԺ նախագահ Արարատ Միրզոյանը, Պաշտպանության  փոխնախարար Գաբրիել Բալայանը, ԱԺ «Լուսավոր Հայաստան» խմբակցության ղեկավար Էդմոն Մարուքյանը, Լոռու մարզպետ Անդրեյ Ղուկասյանը, Վանաձորի քաղաքապետ Մամիկոն Ասլանյանը և  ծառայակից ընկերները։

Հիշեցնենք, որ  Աշոտ Միքայելյանը զոհվել էր հուլիսի 27-ին։ Նա ամուսնացած էր,  սպասում էր առաջնեկի ծնունդին, ընտանիքի հետ ապրում էր Վանաձոր քաղաքում: Ուներ ավագ եղբայր, որը նույնպես զինվորական է։

Հուլիսի 28-ին ՀՀ նախագահ Արմեն Սարգսյանը հիմք ընդունելով վարչապետի միջնորդությունը՝ հայրենիքի սահմանները պաշտպանելիս ցուցաբերած խիզախության և անձնուրացության համար ՀՀ Պաշտպանության նախարարության թիվ N զորամասի դասակի հրամանատար, կապիտան Աշոտ Գևորգի Միքայելյանին հետմահու  պարգևատրել է «Մարտական խաչ» 1-ին աստիճանի շքանշանով։