Երկրային կյանքից հեռացավ հայրս. Միքայել Մելքումյան
Ս.թ. հուլիսի 17-ին կյանքի 89-րդ տարում մահացել է միջազգային էկոլոգիական ակադեմիայի ակադեմիկոս, գիտության դոկտոր, պրոֆեսոր Սերգեյ Մելքումյանը: Այս մասին ֆեյսբուքյան իր էջում գրել է ԲՀԿ խորհրդարանական խմբակցության անդամ Միքայել Մելքումյանը:
«Այսօր 89 տարեկան հասակում երկրային կյանքից հեռացավ հայրս՝ Սերգեյ Ավանեսի Մելքումյանը:
Հանգչի՛ր խաղաղությամբ, սիրելի՛ հայր»:
Նա ծնվել է 1931 թ. նոյեմբերի 10-ին Արցախի Ճարտար գյուղում: 1956 թ. ավարտել է ԵՊՀ աշխարհագրական ֆակուլտետը: Հետագա տարիներին աշխատել է ՀՀ տնտեսական և գիտական տարբեր հաստատություններում: Սերգեյ Մելքումյանը երկար տարիներ ղեկավարել է ՀՊՏՀ տնտեսական աշխարհագրության ամբիոնը:
Ս. Մելքումյանը ավելի քան 400 գիտական աշխատանքների, այդ թվում՝ 35 մենագրությունների հեղինակ է: Դեռևս 1991 թ.-ից հիմնադրել և ղեկավարել է «Արցախ-Հայաստան» հասարակական-քաղաքական կազմակերպությունը:
Սերգեյ Մելքումյանի հիշատակը միշտ վառ կմնա նրա հարազատների, ընկերների և ճանաչողների սրտերում:
Հոգեհանգիստը կկայանա ս. թ. հուլիսի 19-ին ժամը 18.00-ին Կոնդի Սբ. Հովհաննես Մկրտիչ եկեղեցում, հուղարկավորման արարողությունը՝ նույն վայրից հուլիսի 20-ին ժամը 13.00-ին:
