Ամբողջությամբ հիմնանորոգվելու է Աբովյան քաղաքի Հատիսի պողոտան
Կոտայքի մարզպետ Ռոմանոս Պետրոսյանը ֆեյսբուքյան իր էջում գրել է.
«Կառավարության 2020 թվականի սուբվենցիոն ծրագրով ամբողջությամբ հիմնանորոգվելու է Աբովյան քաղաքի Հատիսի պողոտան.
Սուբվենցիաների տրամադրման նպատակով Կառավարությունում ստեղծված միջգերատեսչական հանձնաժողովի նիստում հավանության են արժանացել Կոտայքի մարզից ներկայացված մի շարք ծրագրեր, որոնց թվում է նաև Աբովյան քաղաքի գլխավոր ճանապարհի հիմնանորոգման ծրագիրը:
Այսպիսով 2020 թ. սուբվենցիոն ծրագրի արդյունքում հիմնանորոգվելու է Աբովյան քաղաքի կենտրոնական Հատիս պողոտան՝ 1.5 կմ ճանապարհահատված:
Կատարվելու են ամբողջական ասֆալտապատման, հիմնաքարերի նորոգման ու փոխարինման, ջրահեռացման համակարգի նորոգման և կահավորման աշխատանքներ:
Ծրագրի նախագծանախահաշվային արժեքը կազմում է 369.821.260 ՀՀ դրամ, որից 45%-ը պետության ֆինանսավորումն է, մնացածը՝ համայնքի մասնաբաժինը:Շինարարական աշխատանքների իրականացման մրցույթները մարզպետարանի կողմից շուտով կհայտարարվեն:
Հավելեմ, որ այս տարվա մեկ այլ սուբվենցիոն ծրագրով հաստատվել է նաև Աբովյան քաղաքի Հանրապետության պողոտայի ամբողջական հիմնանորոգման ծրագիրը»:
