Վարչապետի խոսնակը հերքում է Փաշինյանի և Լևոն Տեր–Պետրոսյանի հանդիպման լուրը
Վարչապետ Նիկոլ Փաշինյանն այս ընթացքում եղել է մեկուսացված, որեւէ հանդիպումներ չի ունեցել։ Այս մասին այսօր՝ հունիսի 9–ին, NEWS.am-ի հետ զրույցում ասաց վարչապետի մամուլի խոսնակ Մանե Գեւորգյանը՝ անդրադառնալով մամուլում հրապարակված լուրին, թե Նիկոլ Փաշինյանը երկու օր առաջ հանդիպել է ՀՀ առաջին նախագահ Լեւոն Տեր-Պետրոսյանին։
«Առաջին նախագահ Լեւոն Տեր–Պետրոսյանի հետ այս ընթացքում հանդիպում եղել է մեկ անգամ, հեղափոխությունից հետո՝ 2018 թվականի հուլիսի 16–ին, դրանից հետո հանդիպում չի եղել։ Նման հանդիպում, եթե տեղի ունեցած լիներ, մենք ինչպես հարկն է, դրա մասին կտեղեկացնեինք մեր հանրությանը, լրատվական դաշտին եւ դա գաղտնի չէինք պահի»,– ասաց Գեւորգյանը։
Ավելի վաղ հայտնել էինք, որ «Փաստինֆո»-ի տեղեկություններով՝ երկու օր առաջ ՀՀ վարչապետ Նիկոլ Փաշինյանը հանդիպել է ՀՀ առաջին նախագահ Լեւոն Տեր-Պետրոսյանին։ Ընդ որում՝ հանդիպման ժամանակ վարչապետը դեռ պաշտոնապես համարվում էր կորոնավիրուսով հիվանդ։ Կայքն արձանագրել էր, որ այդ հանդիպումից հետո ազատվեցին ԱԱԾ տնօրենն ու ոստիկանապետը՝ նրանց փոխարինելով ծանոթ-բարեկամական կադրերով։
