Ամբաստանյալ Արմեն Գևորգյանի կինը ևս վարակված է կորոնավիրուսով
Ռոբերտ Քոչարյանի, Յուրի Խաչատուրովի, Սեյրան Օհանյանի և Արմեն Գևորգյանի դեմ հարուցված քրեական գործի քննությունն այսօր ևս հետաձգվեց:
Դատարանը ստացել էր Սեյրան Օհանյանի պաշտպաններից և Կարեն Մեժլումյանի դիմումներն այն մասին, որ իրենք վարակված են COVID-19-ով, ու թեև հիմա հիվանդանոցից դուրս են գրվել, սակայն պետք է գտնվեն 14-օրյա կարանտինում, ուստի խնդրում են հետաձգել այսօրվա դատական նիստը:
Դիմում էր ստացվել նաև ամբաստանյալ Արմեն Գևորգյանից: Նա տեղեկացնում էր, որ COVID-19-ով վարակված է նաև իր կինը՝ Թարամա Գևորգյանը: Նրանք ևս գտնվում են խիստ մեկուսացման մեջ: Ամբաստանյալը խնդրել էր հետաձգել նիստը: Դատավոր Աննա Դանիբեկյանը նիստը հետաձգեց մինչև հունիսի 23-ը:
