Դետրոյթում բողոքի ցույցերի ժամանակ մարդ է սպանվել

Ամերիկյան Դետրոյթ քաղաքում 1 մարդ է մահացել, ավելի քան 40 մարդ ձերբակալվել է Մինեապոլիսում ոստիկանների կողմից աֆրոամերիկացու սպանությունից հետո բողոքի ցույցերի ընթացքում: Այս մասին հայտնում է Detroit News թերթը՝ վկայակոչելով տեղի ոստիկանության պետ Ջեյմս Քրեյգին: Ըստ նրա՝ անհայտ անձինք մեքենայից կրակ են բացել ամբոխի ուղղությամբ:

ԱՄՆ ավելի քան 10 քաղաքներում զանգվածային ցույցեր են անցկացվել աֆրոամերիկացի Ջորջ Ֆլոյդի մահվան պատճառով, որը խեղդամահ էր եղել ոստիկանների կողմից իրականացրած կոշտ ձերբակալության հետևանքով: Մինեապոլսի 46-ամյա բնակիչը մահացել էր մայիսի 25-ին, այն բանից հետո, երբ 3 ոստիկաններ նրան տապալել էին ասֆալտին, իսկ նրանցից մեկը ծնկով սեղմել էր նրա պարանոցը՝ զրկելով տղամարդուն գիտակցությունից։