Աննա Հակոբյանը հեռախոսազրույց է ունեցել Տիգրան Մանսուրյանի ու Ալիս Դուրյանի հետ

«Ամեն օր ավելի ու ավելի եմ հիանում մեր մշակույթի գործիչների կամքով ու լավատեսությամբ։ Այսօր հեռախոսազրույց եմ ունեցել իմ շատ սիրելի մաեստրո Տիգրան Մանսուրյանի և դիրիժոր Օհան Դուրյանի տիկնոջ՝ տիկին Ալիս Դուրյանի հետ։ Շատ ուրախ եմ, որ նրանց տրամադրությունը բարձր է, շարունակում են ստեղծագործել և իրենց գործունեությամբ ոգևորել մյուսներին»,- ֆեյսբուքյան իր էջում գրել է ՀՀ վարչապետի տիկին Աննա Հակոբյանը։

Նա նաև նշել է, որ Տիգրան Մանսուրյանի հետ պայմանավորվել են այս անորոշ վիճակի բարեհաջող ավարտից հետո անպայման հանդիպել, զրուցել.

«Տիկին Դուրյանի առողջական վիճակն էլ է լավ, չի ընկճվում, ընդհակառակը, օգնում է կարիքավոր ընտանիքներին։ Տիկին Դուրյանն անկեղծացավ ու ասաց, որ մեր Արփիի լուսանկարներն իրեն լույս են տալիս։ Պայմանավորվեցինք, որ Արփիի հետ անպայման իրեն կայցելենք։ Ես ու Արփին անհամբեր սպասում ենք այդ հանդիպմանը»։