Տեսնեն՝ Հայաստանում 5-աստղանի հյուրանոցում են մեկուսացնում, տասնյակ հազարներով կգան. վարչապետը կատակեց

ՀՀ կառավարության արտահերթ նիստում քննարկվում էր արտակարգ դրություն սահմանելու դեպքում Հայաստան մուտքի ու ելքի թույլտվությունն արգելելու հարցը: ՀՀ փոխվարչապետ Մհեր Գրիգորյանը համամիտ էր առողջապահության նախարար Արսեն Թորոսյանի հետ, որ պետք է ճկունություն պահել և օդային հաղորդակցությունը չսահմանափակել, ինչպես առաջարկում էր ՀՀ ԱԳ նախարար Զոհրաբ Մնացականյանը: ՀՀ վարչապետ Նիկոլ Փաշինյանը նկատեց.

«Կանգնած պրոցեսը նորից սկսելն ավելի դժվար է, քան թույլ շարունակվողն ակտիվացնելը»:

Թորոսյանը հավելեց.

«Վաղը էդ նույն ռապիդ թեստերը ո՞վ է բերելու Չինաստանից»:

Ավինյանը կատակով նկատեց՝ ֆիլմից հայտնի իրավիճակն է «Всех впускать, никого не выпускать»:

Մհեր Գրիգորյանը նշեց, թե կարևոր է, որ օդային ավիահաղորդակցությունը չի ընդհատվում, ավիափոխադրողը եթե գիտի՝ մի քիչ դրսից մարդ կգա, այստեղից կգնա, դրսից բեռ կգա, այստեղից կգնա, ավիափոխադրումը կկազմակերպի, հակառակ դեպքում դժվար է նրան դա համոզել:

ՀՀ շրջակա միջավայրի նախարար Էրիկ Գրիգորյանը հարց ուղղեց.

«Ինչո՞ւ եկող քաղաքացիների համար չենք տալիս ինքնամեկուսացման կարգավորումը: Թող 14 օրով թող մեկուսացվի, որտեղից էլ որ գալիս է»:

Վարչապետն արձագանքեց.

«Ենթադրենք՝ գալիս է 10 հազար մարդ, ասում է՝ պետք է ինքնամեկուսացվեմ, որտե՞ղ ինքնամեկուսացվեմ: Մենք այժմ 3 000 քաղաքացու պիտի մեկուսացնեինք, մինչդեռ նրանցից 5-6 հոգի է հիվանդ: Բացի այդ, կգան, կարող է՝ մի հատ էլ տեսնեն՝ Հայաստանում 5-աստղանի հյուրանոցում են մեկուսացնում, տասնյակ հազարներով կգան, կասեն՝ գնանք, Հայաստանում մեկուսացվենք»:

Փաշինյանը նաև նշեց՝ ինքնամեկուսացվող քաղաքացու շարժը վերահսկելն էլ է դժվար.

«Պետք է ամեն տան մոտ մի ոստիկան դնենք, որ մեկուսանան»:

Կառավարությունը որոշեց մեկ ժամով ընդմիջել աշխատանքը, հետո շարունակել նիստը: